ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ ਦੇ ਇਕ ਅਕਾਊਂਟੈਂਟ ਥਿਰੁਸੀਵਨ ਪਰੂਮਲ ਰਾਜਾ ਨੂੰ ਆਪਣੀ ਕੰਪਨੀ ਤੋਂ ਲਗਭਗ $4 ਲੱਖ 20 ਹਜ਼ਾਰ ਨਿਊਜ਼ੀਲੈਂਡ ਡਾਲਰ ਦੀ ਚੋਰੀ ਕਰਨ ਦੇ ਮਾਮਲੇ ਵਿੱਚ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ ਹੈ, ਪਰ ਅਦਾਲਤ ਨੇ ਫੈਸਲਾ ਦਿੱਤਾ ਹੈ ਕਿ ਉਸ ਨੂੰ ਚੋਰੀ ਕੀਤੀ ਰਕਮ ਵਾਪਸ ਨਹੀਂ ਕਰਨੀ ਪਵੇਗੀ।
ਅਦਾਲਤ ਅਨੁਸਾਰ, ਦੋਸ਼ੀ ਨੇ ਲਗਭਗ 8 ਸਾਲਾਂ ਦੌਰਾਨ 245 ਨਕਲੀ ਇਨਵਾਇਸ ਤਿਆਰ ਕਰਕੇ ਕੰਪਨੀ ਦੇ ਪੈਸੇ ਆਪਣੇ ਨਿੱਜੀ ਬੈਂਕ ਖਾਤਿਆਂ ਵਿੱਚ ਟਰਾਂਸਫਰ ਕੀਤੇ। ਦੋਸ਼ੀ ਨੇ ਆਪਣਾ ਜੁਰਮ ਕਬੂਲ ਕਰ ਲਿਆ ਸੀ ਅਤੇ ਕਿਹਾ ਸੀ ਕਿ ਇਹ ਰਕਮ ਉਸ ਨੇ ਆਪਣੇ ਕਰਜ਼ੇ ਚੁਕਾਉਣ ਲਈ ਵਰਤੀ।
ਰਾਜਾ ਨੂੰ ਪਹਿਲਾਂ 31 ਮਹੀਨੇ ਦੀ ਕੈਦ ਦੀ ਸਜ਼ਾ ਦਿੱਤੀ ਗਈ ਸੀ ਅਤੇ ਨੀਚਲੀ ਅਦਾਲਤ ਵੱਲੋਂ ਉਸ ਨੂੰ ਪੈਸਾ ਵਾਪਸ ਕਰਨ ਦਾ ਹੁਕਮ ਵੀ ਜਾਰੀ ਕੀਤਾ ਗਿਆ ਸੀ। ਹਾਲਾਂਕਿ, ਉੱਚ ਅਦਾਲਤ ਵਿੱਚ ਦਾਇਰ ਅਪੀਲ ਦੌਰਾਨ ਦੋਸ਼ੀ ਦੇ ਵਕੀਲ ਨੇ ਦਲੀਲ ਦਿੱਤੀ ਕਿ ਰਾਜਾ ਦੀ ਮਾਲੀ ਹਾਲਤ ਬਹੁਤ ਖ਼ਰਾਬ ਹੈ ਅਤੇ ਉਸ ਕੋਲ ਰਕਮ ਵਾਪਸ ਕਰਨ ਦੀ ਸਮਰਥਾ ਨਹੀਂ ਹੈ।
ਅਦਾਲਤ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਦੋਸ਼ੀ ਕੋਲ ਸਿਰਫ਼ ਲਗਭਗ $1 ਲੱਖ ਡਾਲਰ ਦੀ KiwiSaver ਪੈਨਸ਼ਨ ਰਕਮ ਹੈ, ਜਦਕਿ ਉਹ ਹੋਰ ਭਾਰੀ ਕਰਜ਼ੇ ਹੇਠ ਹੈ। ਇਸ ਦੇ ਮੱਦੇਨਜ਼ਰ, ਅਦਾਲਤ ਨੇ ਕਿਹਾ ਕਿ ਪੈਸਾ ਵਾਪਸ ਕਰਨ ਦਾ ਹੁਕਮ ਦੇਣਾ ਦੋਸ਼ੀ ਲਈ “ਬੇਹੱਦ ਮੁਸ਼ਕਲ ਬਣੇਗਾ, ਇਸ ਲਈ ਰਿਪੇਰੇਸ਼ਨ ਆਰਡਰ ਰੱਦ ਕਰ ਦਿੱਤਾ ਗਿਆ।
ਇਸ ਫੈਸਲੇ ਨਾਲ ਦੋਸ਼ੀ ਜੇਲ੍ਹ ਦੀ ਸਜ਼ਾ ਤਾਂ ਭੁਗਤੇਗਾ, ਪਰ ਉਸ ਤੋਂ ਚੋਰੀ ਕੀਤੀ ਰਕਮ ਦੀ ਵਾਪਸੀ ਨਹੀਂ ਹੋਵੇਗੀ, ਜਿਸ ਕਾਰਨ ਇਹ ਮਾਮਲਾ ਕਾਫੀ ਚਰਚਾ ਵਿੱਚ ਆ ਗਿਆ ਹੈ।
ਆਕਲੈਂਡ ਦਾ ਅਕਾਊਂਟੈਂਟ $4.2 ਲੱਖ ਦੀ ਚੋਰੀ ਮਾਮਲੇ ’ਚ ਜੇਲ੍ਹ ਗਿਆ, ਪੈਸੇ ਵਾਪਸ ਨਹੀਂ ਕਰਨੇ ਪੈਣਗੇ
