ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਸਰਕਾਰ ਨੇ ਡ੍ਰਾਈਵਿੰਗ ਲਾਇਸੰਸ ਪ੍ਰਣਾਲੀ ਵਿੱਚ ਵੱਡੇ ਬਦਲਾਅ ਦੀ ਪੁਸ਼ਟੀ ਕਰ ਦਿੱਤੀ ਹੈ। ਨਵੇਂ ਫੈਸਲੇ ਅਨੁਸਾਰ ਹੁਣ ਰਿਸਟ੍ਰਿਕਟਿਡ ਤੋਂ ਫੁੱਲ ਲਾਇਸੰਸ ਲਈ ਲੱਗਣ ਵਾਲਾ ਪੂਰਾ ਪ੍ਰੈਕਟਿਕਲ ਟੈਸਟ ਖਤਮ ਕਰ ਦਿੱਤਾ ਜਾਵੇਗਾ, ਜਿਸ ਨਾਲ ਲਾਇਸੰਸ ਬਣਵਾਉਣ ਦੀ ਕੁੱਲ ਲਾਗਤ ਵਿੱਚ ਲਗਭਗ $80 ਦੀ ਕਮੀ ਆਵੇਗੀ।
ਸਰਕਾਰ ਮੁਤਾਬਕ ਇਹ ਤਬਦੀਲੀਆਂ 25 ਜਨਵਰੀ 2027 ਤੋਂ ਲਾਗੂ ਹੋਣਗੀਆਂ। ਇਸ ਤੋਂ ਬਾਅਦ ਕਲਾਸ 1 (ਕਾਰ) ਡ੍ਰਾਈਵਿੰਗ ਲਾਇਸੰਸ ਦੀ ਕੁੱਲ ਲਾਗਤ ਘਟ ਕੇ $282.50 ਰਹਿ ਜਾਵੇਗੀ। ਹਾਲਾਂਕਿ ਰਿਸਟ੍ਰਿਕਟਿਡ ਲਾਇਸੰਸ ਲਈ ਪ੍ਰੈਕਟਿਕਲ ਟੈਸਟ ਜਾਰੀ ਰਹੇਗਾ।
ਨਵੇਂ ਨਿਯਮਾਂ ਅਨੁਸਾਰ, 25 ਸਾਲ ਤੋਂ ਘੱਟ ਉਮਰ ਵਾਲੇ ਡ੍ਰਾਈਵਰਾਂ ਨੂੰ ਹੁਣ 12 ਮਹੀਨੇ ਲਈ ਲਰਨਰ ਲਾਇਸੰਸ ‘ਤੇ ਰਹਿਣਾ ਪਵੇਗਾ, ਜੋ ਪਹਿਲਾਂ ਛੇ ਮਹੀਨੇ ਸੀ। ਹਾਲਾਂਕਿ ਮਨਜ਼ੂਰਸ਼ੁਦਾ ਡ੍ਰਾਈਵਿੰਗ ਕੋਰਸ ਜਾਂ ਨਿਰੀਖਿਤ ਡ੍ਰਾਈਵਿੰਗ ਘੰਟਿਆਂ ਦੇ ਜ਼ਰੀਏ ਇਹ ਮਿਆਦ ਘਟਵਾਈ ਜਾ ਸਕੇਗੀ।
ਇਸੇ ਤਰ੍ਹਾਂ, ਰਿਸਟ੍ਰਿਕਟਿਡ ਲਾਇਸੰਸ ਦੀ ਮਿਆਦ ਵੀ ਉਮਰ ਦੇ ਅਧਾਰ ‘ਤੇ ਤੈਅ ਕੀਤੀ ਗਈ ਹੈ—25 ਸਾਲ ਤੋਂ ਘੱਟ ਉਮਰ ਵਾਲਿਆਂ ਲਈ 12 ਮਹੀਨੇ ਅਤੇ 25 ਤੋਂ ਉੱਪਰ ਲਈ 6 ਮਹੀਨੇ। ਜੇਕਰ ਇਸ ਦੌਰਾਨ ਕਿਸੇ ਡ੍ਰਾਈਵਰ ਨੂੰ ਡੀਮੈਰਿਟ ਪੁਆਇੰਟ ਮਿਲਦੇ ਹਨ ਤਾਂ ਇਹ ਮਿਆਦ ਹੋਰ ਛੇ ਮਹੀਨੇ ਵਧ ਜਾਵੇਗੀ।
ਹੋਰ ਬਦਲਾਵਾਂ ਵਿੱਚ ਲਰਨਰ ਅਤੇ ਰਿਸਟ੍ਰਿਕਟਿਡ ਲਾਇਸੰਸਧਾਰਕਾਂ ਲਈ ਸ਼ਰਾਬ ਦੀ ਬਿਲਕੁਲ ਮਨਾਹੀ (ਜ਼ੀਰੋ ਅਲਕੋਹਲ ਲਿਮਿਟ), ਨਜ਼ਰ ਜਾਂਚਾਂ ਦੀ ਗਿਣਤੀ ਵਿੱਚ ਕਮੀ ਅਤੇ ਰਿਸਟ੍ਰਿਕਟਿਡ ਟੈਸਟ ਵਿੱਚ ਹੈਜ਼ਰਡ ਪਰਸੈਪਸ਼ਨ ਟੈਸਟ ਨੂੰ ਸ਼ਾਮਲ ਕਰਨਾ ਵੀ ਸ਼ਾਮਲ ਹੈ।
ਆਟੋਮੋਬਾਈਲ ਐਸੋਸੀਏਸ਼ਨ ਨੇ ਸਰਕਾਰ ਦੇ ਇਸ ਫੈਸਲੇ ਦਾ ਸਵਾਗਤ ਕਰਦਿਆਂ ਕਿਹਾ ਹੈ ਕਿ ਇਹ ਬਦਲਾਅ ਖਰਚ ਘਟਾਉਣ ਦੇ ਨਾਲ-ਨਾਲ ਪ੍ਰਣਾਲੀ ਨੂੰ ਜ਼ਿਆਦਾ ਸੁਗਮ ਬਣਾਉਣਗੇ ਅਤੇ ਸੜਕ ਸੁਰੱਖਿਆ ਨਾਲ ਵੀ ਸੰਤੁਲਨ ਬਣਾਈ ਰੱਖਣਗੇ।
ਨਿਊਜ਼ੀਲੈਂਡ ਵਿੱਚ ਡ੍ਰਾਈਵਿੰਗ ਲਾਇਸੰਸ ਨਿਯਮਾਂ ‘ਚ ਵੱਡਾ ਬਦਲਾਅ: ਫੁੱਲ ਪ੍ਰੈਕਟਿਕਲ ਟੈਸਟ ਖਤਮ, ਲਾਗਤ ਵਿੱਚ $80 ਦੀ ਕਟੌਤੀ
