ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ ਅੰਤਰਰਾਸ਼ਟਰੀ ਏਅਰਪੋਰਟ ‘ਤੇ ਕਸਟਮਜ਼ ਅਧਿਕਾਰੀਆਂ ਨੇ ਵੱਡੀ ਕਾਰਵਾਈ ਕਰਦਿਆਂ 36 ਕਿਲੋਗ੍ਰਾਮ ਮੈਥਾਮਫੇਟਮਾਈਨ (ਕਲਾਸ ਏ- ਨਸ਼ਾ) ਬਰਾਮਦ ਕੀਤੀ ਹੈ, ਜੋ ਕਿ ਪਲੇਬੋਇ ਬ੍ਰਾਂਡ ਦੇ ਗ੍ਰੀਨ ਟੀ ਪੈਕੇਟਾਂ ਵਿੱਚ ਛੁਪਾਈ ਗਈ ਸੀ। ਇਸ ਮਾਮਲੇ ਵਿੱਚ ਦੋ ਯਾਤਰੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਕਸਟਮਜ਼ ਅਨੁਸਾਰ, ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀ ਇੱਕ 25 ਸਾਲਾ ਆਸਟ੍ਰੇਲੀਆਈ ਨਾਗਰਿਕ ਅਤੇ ਇੱਕ 23 ਸਾਲਾ ਨਿਊਜ਼ੀਲੈਂਡ ਨਾਗਰਿਕ ਹਨ, ਜੋ ਸਿੰਗਾਪੁਰ ਤੋਂ ਆਈ ਫਲਾਈਟ ਰਾਹੀਂ ਨਿਊਜ਼ੀਲੈਂਡ ਪਹੁੰਚੇ ਸਨ। ਤਲਾਸ਼ੀ ਦੌਰਾਨ ਉਨ੍ਹਾਂ ਦੇ ਦੋ ਸੂਟਕੇਸਾਂ ਵਿੱਚ ਵੈਕਿਊਮ-ਸੀਲ ਕੀਤੀਆਂ ਮੈਥ ਦੀਆਂ ਥੈਲੀਆਂ ਮਿਲੀਆਂ, ਜੋ ਗ੍ਰੀਨ ਟੀ ਦੇ ਪੈਕੇਟਾਂ ਵਿੱਚ ਲਪੇਟੀਆਂ ਹੋਈਆਂ ਸਨ।
ਕਸਟਮਜ਼ ਦਾ ਕਹਿਣਾ ਹੈ ਕਿ ਬਰਾਮਦ ਕੀਤੀ ਗਈ ਮੈਥ ਦੀ ਮਾਤਰਾ ਲਗਭਗ 18 ਲੱਖ ਖੁਰਾਕਾਂ ਦੇ ਬਰਾਬਰ ਹੈ, ਜਿਸ ਦਾ ਬਾਜ਼ਾਰ ਮੁੱਲ ਕਰੀਬ 1 ਕਰੋੜ 8 ਲੱਖ ਨਿਊਜ਼ੀਲੈਂਡ ਡਾਲਰ ਅੰਕਿਆ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ, ਇਸ ਕਾਰਵਾਈ ਨਾਲ ਦੇਸ਼ ਨੂੰ ਤਕਰੀਬਨ 3.7 ਕਰੋੜ ਡਾਲਰ ਦੇ ਸਮਾਜਕ ਨੁਕਸਾਨ ਤੋਂ ਬਚਾਇਆ ਗਿਆ ਹੈ।
ਕਸਟਮਜ਼ ਦੇ ਸੀਨੀਅਰ ਅਧਿਕਾਰੀਆਂ ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਨੈੱਟਵਰਕ ਨਵੇਂ-ਨਵੇਂ ਤਰੀਕੇ ਅਪਣਾ ਰਹੇ ਹਨ, ਪਰ ਏਅਰਪੋਰਟ ‘ਤੇ ਸਖ਼ਤ ਜਾਂਚ ਕਾਰਨ ਅਜਿਹੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਨਸ਼ਾ ਤਸਕਰੀ ਵਿੱਚ ਸ਼ਾਮਲ ਹੋਣਾ ਗੰਭੀਰ ਅਪਰਾਧ ਹੈ, ਜਿਸ ਦੀ ਸਜ਼ਾ ਬਹੁਤ ਕਠੋਰ ਹੋ ਸਕਦੀ ਹੈ।
ਦੋਸ਼ੀਆਂ ਨੂੰ ਮਨੂਕਾਊ ਡਿਸਟ੍ਰਿਕਟ ਕੋਰਟ ਵਿੱਚ ਪੇਸ਼ ਕੀਤਾ ਗਿਆ ਹੈ, ਜਿੱਥੇ ਉਨ੍ਹਾਂ ‘ਤੇ ਕਲਾਸ ਏ ਨਸ਼ੇ ਦੀ ਆਯਾਤ ਅਤੇ ਸਪਲਾਈ ਦੇ ਦੋਸ਼ ਲਗਾਏ ਗਏ ਹਨ। ਦੋਸ਼ ਸਾਬਤ ਹੋਣ ਦੀ ਸੂਰਤ ਵਿੱਚ ਉਨ੍ਹਾਂ ਨੂੰ ਜ਼ਿੰਦਗੀ ਕੈਦ ਤੱਕ ਦੀ ਸਜ਼ਾ ਹੋ ਸਕਦੀ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ।
ਪਲੇਬੋਇ ਬ੍ਰਾਂਡ ਗ੍ਰੀਨ ਟੀ ਦੇ ਪੈਕੇਟਾਂ ‘ਚ 36 ਕਿਲੋ ਮੈਥ, ਆਕਲੈਂਡ ਏਅਰਪੋਰਟ ‘ਤੇ ਦੋ ਗ੍ਰਿਫ਼ਤਾਰ
