ਉੱਚ ਖ਼ਤਰੇ ਵਾਲੇ ਯੌਨ ਅਪਰਾਧੀ ਲਈ Public Protection Order ਮੁੜ ਲਾਗੂ

ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੀ ਹਾਈ ਕੋਰਟ ਨੇ ਬਹੁਤ ਉੱਚ ਖ਼ਤਰੇ ਵਾਲੇ ਯੌਨ ਅਪਰਾਧੀ Glen Anthony Douglas Finch ਲਈ Public Protection Order (PPO) ਮੁੜ ਲਾਗੂ ਕਰਨ ਦਾ ਫ਼ੈਸਲਾ ਸੁਣਾਇਆ ਹੈ। ਅਦਾਲਤ ਦੇ ਹੁਕਮ ਮੁਤਾਬਕ ਉਹ ਹੁਣ ਵੀ ਸਖ਼ਤ ਸੁਰੱਖਿਆ ਹੇਠ ਇਕ ਖ਼ਾਸ ਫੈਸਿਲਟੀ ਵਿੱਚ ਹੀ ਰਹੇਗਾ।
34 ਸਾਲਾ ਡਗਲਸ-ਫਿੰਚ ਉਹ ਪਹਿਲਾ ਵਿਅਕਤੀ ਸੀ ਜਿਸ ਉੱਤੇ 2016 ਵਿੱਚ ਇਹ ਕੜਾ ਕਾਨੂੰਨੀ ਹੁਕਮ ਲਗਾਇਆ ਗਿਆ ਸੀ। ਇਸ ਦੇ ਤਹਿਤ ਉਹ ਪਿਛਲੇ ਲਗਭਗ ਨੌ ਸਾਲਾਂ ਤੋਂ Matawhāiti Residence ਵਿੱਚ ਰਹਿ ਰਿਹਾ ਹੈ, ਜੋ ਕਿ Christchurch Men’s Prison ਦੇ ਨੇੜੇ ਸਥਿਤ ਹੈ।
ਅਦਾਲਤ ਵਿੱਚ ਡਗਲਸ-ਫਿੰਚ ਵੱਲੋਂ ਮੰਗ ਕੀਤੀ ਗਈ ਸੀ ਕਿ ਉਸ ਨੂੰ Extended Supervision Order (ESO) ਦੇ ਤਹਿਤ ਕਮਿਊਨਿਟੀ ਵਿੱਚ ਰਹਿਣ ਦੀ ਆਗਿਆ ਦਿੱਤੀ ਜਾਵੇ। ਪਰ ਕੋਰਟ ਨੇ ਇਹ ਦਲੀਲ ਰੱਦ ਕਰਦਿਆਂ ਕਿਹਾ ਕਿ ਮਾਹਿਰਾਂ ਦੀਆਂ ਰਿਪੋਰਟਾਂ ਅਤੇ ਉਸ ਦੇ ਪਿਛਲੇ ਅਪਰਾਧਿਕ ਰਿਕਾਰਡ ਨੂੰ ਦੇਖਦੇ ਹੋਏ ਉਹ ਸਮਾਜ ਲਈ ਅਜੇ ਵੀ ਗੰਭੀਰ ਯੌਨ ਅਪਰਾਧ ਦਾ ਉੱਚ ਖ਼ਤਰਾ ਬਣਿਆ ਹੋਇਆ ਹੈ।
ਅਦਾਲਤ ਨੇ ਆਪਣੇ ਫ਼ੈਸਲੇ ਵਿੱਚ ਕਿਹਾ ਕਿ ਜਨਤਾ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਉਸ ਨੂੰ ਸੁਰੱਖਿਅਤ ਫੈਸਿਲਟੀ ਵਿੱਚ ਹੀ ਰੱਖਣਾ ਲਾਜ਼ਮੀ ਹੈ। ਰਿਪੋਰਟਾਂ ਮੁਤਾਬਕ ਉਸ ਦਾ ਨਾਬਾਲਗ ਲੜਕਿਆਂ ਨਾਲ ਅਣਉਚਿਤ ਵਿਵਹਾਰ ਦਾ ਲੰਮਾ ਇਤਿਹਾਸ ਰਿਹਾ ਹੈ ਅਤੇ ਉਸ ਨੂੰ Autism Spectrum Disorder ਸਮੇਤ ਕੁਝ ਮਾਨਸਿਕ ਅਤੇ ਬੁੱਧੀ ਸੰਬੰਧੀ ਸਮੱਸਿਆਵਾਂ ਵੀ ਹਨ।
ਅਦਾਲਤ ਦੇ ਇਸ ਤਾਜ਼ਾ ਫ਼ੈਸਲੇ ਨਾਲ ਡਗਲਸ-ਫਿੰਚ ਉੱਤੇ ਲਾਗੂ Public Protection Order ਜਾਰੀ ਰਹੇਗਾ ਅਤੇ ਉਹ ਹੁਣ ਵੀ ਸਖ਼ਤ ਨਿਗਰਾਨੀ ਹੇਠ ਰਹੇਗਾ।