ਆਕਲੈਂਡ (ਐੱਨ ਜੈੱਡ ਤਸਵੀਰ) ਵੈਲਿੰਗਟਨ ਗਰਲਜ਼ ਕਾਲਜ ਵਿੱਚ ਖਸਰੇ ਦੀ ਸੰਭਾਵਨਾ ਨੇ ਚਿੰਤਾ ਵਧਾ ਦਿੱਤੀ ਹੈ। ਸਕੂਲ ਦੇ ਚਾਰ ਸਟਾਫ਼ ਮੈਂਬਰਾਂ ਅਤੇ ਲਗਭਗ 60 ਵਿਦਿਆਰਥੀਆਂ ਨੂੰ ਉਸ ਵਿਅਕਤੀ ਦੇ ਸੰਭਾਵੀ ਸੰਪਰਕਾਂ ਵਜੋਂ ਪਛਾਣਿਆ ਗਿਆ ਹੈ ਜਿਸ ਨੂੰ ਖਸਰੇ ਦੀ ਪੁਸ਼ਟੀ ਹੋ ਚੁੱਕੀ ਹੈ।
ਸਕੂਲ ਪ੍ਰਬੰਧਕਾਂ ਨੇ ਪੁਸ਼ਟੀ ਕੀਤੀ ਹੈ ਕਿ ਹੈਲਥ ਨਿਊਜ਼ੀਲੈਂਡ ਹੁਣ ਇਨ੍ਹਾਂ ਵਿਅਕਤੀਆਂ ਨਾਲ ਸੰਪਰਕ ਕਰ ਰਹੀ ਹੈ ਅਤੇ ਇਹ ਨਿਰਧਾਰਤ ਕਰੇਗੀ ਕਿ ਕੀ ਉਨ੍ਹਾਂ ਨੂੰ ਘਰ ਵਿੱਚ ਰਹਿ ਕੇ isolation ਦੀ ਲੋੜ ਹੈ ਜਾਂ ਨਹੀਂ।
ਐਤਵਾਰ ਨੂੰ ਜਾਰੀ ਕੀਤੇ ਪੱਤਰ ਅਨੁਸਾਰ, ਖਸਰੇ ਨਾਲ ਸੰਕਰਮਿਤ ਵਿਅਕਤੀ 13 ਅਕਤੂਬਰ (ਸੋਮਵਾਰ) ਨੂੰ ਸਵੇਰੇ 8:45 ਵਜੇ ਤੋਂ ਦੁਪਹਿਰ ਤੱਕ ਕਾਲਜ ਵਿੱਚ ਮੌਜੂਦ ਸੀ। ਹੈਲਥ ਐਨਜੈੱਡ ਨੇ ਕਿਹਾ ਹੈ ਕਿ ਸਭ ਤੋਂ ਵੱਧ ਜੋਖਿਮ ਵਾਲੇ ਸੰਪਰਕਾਂ ਨਾਲ ਉਹ ਸਿੱਧਾ ਸੰਪਰਕ ਕਰ ਰਹੀ ਹੈ।
ਪੱਤਰ ਵਿੱਚ ਚੇਤਾਵਨੀ ਦਿੱਤੀ ਗਈ ਹੈ ਕਿ,
“ਇਨ੍ਹਾਂ ਲੋਕਾਂ ਨੂੰ ਨਜ਼ਦੀਕੀ ਸੰਪਰਕ ਮੰਨਿਆ ਜਾਂਦਾ ਹੈ ਅਤੇ ਉਨ੍ਹਾਂ ਨੂੰ ਦੂਜਿਆਂ ਵਿੱਚ ਖਸਰਾ ਫੈਲਣ ਤੋਂ ਰੋਕਣ ਲਈ ਘਰ ਰਹਿਣ ਦੀ ਲੋੜ ਹੋ ਸਕਦੀ ਹੈ।”
ਇਸ ਵੇਲੇ ਤੱਕ ਦੇਸ਼ ਭਰ ਵਿੱਚ ਖਸਰੇ ਦੇ 8 ਮਾਮਲੇ ਪੁਸ਼ਟੀਤ ਹੋ ਚੁੱਕੇ ਹਨ, ਜਦਕਿ ਆਕਲੈਂਡ, ਤਰਾਨਾਕੀ, ਨੈਲਸਨ-ਮਾਰਲਬਰੋ, ਤਸਮਾਨ, ਅਤੇ ਮਾਨਵਾਟੂ-ਵਹਾਂਗਾਨੁਈ ਖੇਤਰਾਂ ਵਿੱਚ ਸਿਹਤ ਅਧਿਕਾਰੀਆਂ ਨੇ ਚੇਤਾਵਨੀ ਜਾਰੀ ਕੀਤੀ ਹੈ।
ਹੈਲਥ ਨਿਊਜ਼ੀਲੈਂਡ ਨੇ ਅਜੇ ਤੱਕ ਵੈਲਿੰਗਟਨ ਗਰਲਜ਼ ਕਾਲਜ ਦੇ ਮਾਮਲੇ ‘ਤੇ ਕੋਈ ਅਧਿਕਾਰਤ ਟਿੱਪਣੀ ਨਹੀਂ ਕੀਤੀ ਹੈ, ਪਰ ਸਾਰੇ ਸਕੂਲਾਂ ਨੂੰ ਸਾਵਧਾਨੀ ਵਜੋਂ ਆਪਣੀਆਂ ਟੀਕਾਕਰਨ ਰਿਕਾਰਡਾਂ ਦੀ ਜਾਂਚ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।
ਵੈਲਿੰਗਟਨ ਗਰਲਜ਼ ਕਾਲਜ ‘ਚ ਖਸਰੇ ਦਾ ਖ਼ਤਰਾ, 60 ਵਿਦਿਆਰਥੀ ਤੇ 4 ਸਟਾਫ਼ ਮੈਂਬਰ ਸੰਭਾਵੀ ਸੰਪਰਕ ਵਿੱਚ
