ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ ਜ਼ਿਲ੍ਹਾ ਅਦਾਲਤ ਨੇ ਮੋਰਟਗੇਜ ਧੋਖਾਧੜੀ ਦੇ ਇੱਕ ਵੱਡੇ ਮਾਮਲੇ ਵਿੱਚ ਪੰਜਾਬੀ ਨੌਜਵਾਨ ਗੁਰਰਾਜ ਸਿੰਘ ਨੂੰ ਦੋਸ਼ੀ ਕਰਾਰ ਦਿੰਦਿਆਂ ਨੌਂ ਮਹੀਨੇ ਦੀ ਹੋਮ ਡਿਟੈਂਸ਼ਨ ਦੀ ਸਜ਼ਾ ਸੁਣਾਈ ਹੈ। ਗੁਰਰਾਜ ਸਿੰਘ ‘ਤੇ ਦੋਸ਼ ਹੈ ਕਿ ਉਸ ਨੇ ਧੋਖੇਬਾਜ਼ੀ ਰਾਹੀਂ 2 ਮਿਲੀਅਨ ਡਾਲਰ ਤੋਂ ਵੱਧ ਦੀ ਰਕਮ ਦੇ ਬੈਂਕ ਲੋਨ ਹਾਸਿਲ ਕੀਤੇ।
ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਗੁਰਰਾਜ ਸਿੰਘ ਨੇ ਪਿਛਲੇ ਸਾਲ ਸਤੰਬਰ ਮਹੀਨੇ ਵਿੱਚ 12 ਦੋਸ਼ਾਂ ਨੂੰ ਕਬੂਲ ਕੀਤਾ ਸੀ, ਜੋ ਕਿ ਚਾਰ ਜਾਇਦਾਦਾਂ ਨਾਲ ਸੰਬੰਧਿਤ ਸਨ। ਇਹ ਮਾਮਲਾ Serious Fraud Office (SFO) ਵੱਲੋਂ ਜਾਂਚਿਆ ਗਿਆ ਸੀ।
SFO ਮੁਤਾਬਕ, ਦੋਸ਼ੀ ਨੇ ਵਪਾਰਕ ਆਮਦਨ ਅਤੇ ਨਕਦੀ ਤੋਹਫ਼ਿਆਂ ਸਬੰਧੀ ਝੂਠੇ ਦਸਤਾਵੇਜ਼ ਤਿਆਰ ਕਰਕੇ ਬੈਂਕਾਂ ਅਤੇ ਪ੍ਰਾਪਰਟੀ ਵਕੀਲਾਂ ਨੂੰ ਗਲਤ ਜਾਣਕਾਰੀ ਦਿੱਤੀ। ਇਨ੍ਹਾਂ ਝੂਠੀਆਂ ਪੇਸ਼ਕਾਰੀਆਂ ਦੇ ਆਧਾਰ ‘ਤੇ ਉਸ ਨੇ ਤਿੰਨ ਰਹਾਇਸ਼ੀ ਜਾਇਦਾਦਾਂ ਲਈ ਕੁੱਲ $2,862,650 ਦੇ ਬੈਂਕ ਲੋਨ ਹਾਸਿਲ ਕੀਤੇ।
SFO ਨੇ ਇਹ ਵੀ ਦੱਸਿਆ ਕਿ ਗੁਰਰਾਜ ਸਿੰਘ ਨੇ ਆਪਣੇ ਲਈ ਜਾਂ ਹੋਰਨਾਂ ਦੇ ਹਿੱਤ ਵਿੱਚ ਜਾਇਦਾਦਾਂ ‘ਤੇ ਕਬਜ਼ਾ ਹਾਸਿਲ ਕਰਨ ਦੇ ਮਕਸਦ ਨਾਲ ਵੀ ਧੋਖੇਬਾਜ਼ ਤਰੀਕਿਆਂ ਦੀ ਵਰਤੋਂ ਕੀਤੀ।
ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਗੁਰਰਾਜ ਸਿੰਘ 2019 ਵਿੱਚ ਨਿਊਜ਼ੀਲੈਂਡ ਛੱਡ ਕੇ ਦੇਸ਼ ਤੋਂ ਬਾਹਰ ਚਲਾ ਗਿਆ ਸੀ, ਪਰ ਦਸੰਬਰ 2023 ਵਿੱਚ ਵਾਪਸੀ ‘ਤੇ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਅਦਾਲਤੀ ਕਾਰਵਾਈ ਸ਼ੁਰੂ ਕੀਤੀ ਗਈ।
ਅਦਾਲਤ ਨੇ ਸਜ਼ਾ ਸੁਣਾਉਂਦਿਆਂ ਕਿਹਾ ਕਿ ਇਸ ਕਿਸਮ ਦੀ ਧੋਖਾਧੜੀ ਵਿੱਤੀ ਪ੍ਰਣਾਲੀ ‘ਤੇ ਲੋਕਾਂ ਦੇ ਭਰੋਸੇ ਨੂੰ ਗੰਭੀਰ ਨੁਕਸਾਨ ਪਹੁੰਚਾਉਂਦੀ ਹੈ ਅਤੇ ਅਜਿਹੇ ਅਪਰਾਧਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਲਾਜ਼ਮੀ ਹੈ।
ਆਕਲੈਂਡ ਜ਼ਿਲ੍ਹਾ ਅਦਾਲਤ ਵੱਲੋਂ ਮੋਰਟਗੇਜ ਧੋਖਾਧੜੀ ਮਾਮਲੇ ‘ਚ ਪੰਜਾਬੀ ਨੌਜਵਾਨ ਨੂੰ ਹੋਮ ਡਿਟੈਂਸ਼ਨ ਦੀ ਸਜ਼ਾ
