ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਵਿੱਚ ਇੱਕ ਮਹਿਲਾ ਅਧਿਆਪਕਾ ਨੂੰ ਵਿਦਿਆਰਥੀਆਂ ਨਾਲ ਅਣਉਚਿਤ ਵਿਹਾਰ ਕਰਨ ਦੇ ਮਾਮਲੇ ਵਿੱਚ ਅਧਿਆਪਕਾਂ ਦੇ ਅਨੁਸ਼ਾਸ਼ਨ ਟ੍ਰਿਬਿਊਨਲ ਵੱਲੋਂ ਸਖ਼ਤ ਫਟਕਾਰ ਲਗਾਈ ਗਈ ਹੈ। ਟ੍ਰਿਬਿਊਨਲ ਨੇ ਕਿਹਾ ਕਿ ਅਧਿਆਪਕਾ ਨੇ ਆਪਣੇ ਪੇਸ਼ੇ ਦੀਆਂ ਹੱਦਾਂ ਪਾਰ ਕਰਦਿਆਂ ਵਿਦਿਆਰਥੀਆਂ ਨਾਲ ਐਸਾ ਰਵੱਈਆ ਅਪਣਾਇਆ ਜੋ ਕਬੂਲਯੋਗ ਨਹੀਂ।
ਆਰਐੱਨਜੈੱਡ ਦੀ ਰਿਪੋਰਟ ਮੁਤਾਬਕ ਅਧਿਆਪਕਾ ਵਿਦਿਆਰਥੀਆਂ ਨਾਲ ਆਪਣੀ ਨਿੱਜੀ ਜ਼ਿੰਦਗੀ ਬਾਰੇ ਗੱਲਾਂ ਕਰਦੀ ਰਹੀ, ਉਨ੍ਹਾਂ ਨੂੰ ਡੇਟਿੰਗ ਨਾਲ ਜੁੜੀਆਂ ਤਸਵੀਰਾਂ ਵਿਖਾਈਆਂ ਅਤੇ ਅਜਿਹੀਆਂ ਗੱਲਾਂ ਸਾਂਝੀਆਂ ਕੀਤੀਆਂ, ਜਿਨ੍ਹਾਂ ਨਾਲ ਕਈ ਵਿਦਿਆਰਥੀ ਅਸੁਖਦ ਮਹਿਸੂਸ ਕਰਦੇ ਸਨ।
ਟ੍ਰਿਬਿਊਨਲ ਸਾਹਮਣੇ ਇਹ ਵੀ ਆਇਆ ਕਿ ਉਸ ਨੇ ਅਧਿਆਪਕ ਦੀ ਥਾਂ ਇੱਕ ਮਿੱਤਰ ਵਾਂਗ ਵਿਹਾਰ ਕੀਤਾ, ਕਲਾਸ ਤੋਂ ਬਾਹਰ ਵੀ ਵਿਦਿਆਰਥੀਆਂ ਨਾਲ ਨਜ਼ਦੀਕੀ ਬਣਾਈ ਰੱਖੀ ਅਤੇ ਕੁਝ ਮਾਮਲਿਆਂ ਵਿੱਚ ਉਨ੍ਹਾਂ ਲਈ ਵੇਪ ਵਰਗੀਆਂ ਚੀਜ਼ਾਂ ਵੀ ਖਰੀਦੀਆਂ।
ਅਨੁਸ਼ਾਸ਼ਨ ਟ੍ਰਿਬਿਊਨਲ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਅਧਿਆਪਕਾਂ ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਵਿਦਿਆਰਥੀਆਂ ਨਾਲ ਸਪਸ਼ਟ ਪੇਸ਼ਾਵਰ ਹੱਦਾਂ ਵਿੱਚ ਰਹਿਣ। ਇਸ ਮਾਮਲੇ ਵਿੱਚ ਅਧਿਆਪਕਾ ਦਾ ਰਵੱਈਆ ਅਣਉਚਿਤ ਅਤੇ ਪੇਸ਼ੇ ਦੀ ਇੱਜ਼ਤ ਨੂੰ ਨੁਕਸਾਨ ਪਹੁੰਚਾਉਣ ਵਾਲਾ ਕਰਾਰ ਦਿੱਤਾ ਗਿਆ।
ਟ੍ਰਿਬਿਊਨਲ ਨੇ ਅਧਿਆਪਕਾ ਨੂੰ ਫਟਕਾਰ ਲਗਾਉਂਦੇ ਹੋਏ ਕਾਨੂੰਨੀ ਖ਼ਰਚੇ ਭਰਨ ਦੇ ਹੁਕਮ ਵੀ ਦਿੱਤੇ ਹਨ। ਦੱਸਿਆ ਗਿਆ ਹੈ ਕਿ ਉਹ ਹੁਣ ਅਧਿਆਪਕੀ ਪੇਸ਼ੇ ਵਿੱਚ ਕੰਮ ਨਹੀਂ ਕਰ ਰਹੀ।
ਵਿਦਿਆਰਥੀਆਂ ਨਾਲ ਗਲਤ ਵਰਤਾਓ ’ਤੇ ਅਧਿਆਪਕਾ ਨੂੰ ਅਨੁਸ਼ਾਸ਼ਨ ਟ੍ਰਿਬਿਊਨਲ ਵੱਲੋਂ ਫਟਕਾਰ
