ਖਾਣਾ ਦੇਰ ਨਾਲ ਮਿਲਣ ਕਾਰਨ ਸ਼ੂਗਰ ਮਰੀਜ਼ ਦੀ ਮੌਤ, ਹਸਪਤਾਲ ‘ਤੇ ਉਠੇ ਸਵਾਲ

ਵੈਲਿੰਗਟਨ (ਐੱਨ ਜੈੱਡ ਤਸਵੀਰ) ਹੈਮਿਲਟਨ ਦੇ ਵਾਇਕਾਟੋ ਹਸਪਤਾਲ ਵਿੱਚ ਇੱਕ ਬਜ਼ੁਰਗ ਸ਼ੂਗਰ ਮਰੀਜ਼ ਦੀ ਮੌਤ ਹੋਣ ਤੋਂ ਬਾਅਦ ਹਸਪਤਾਲ ਦੀ ਕਾਰਵਾਈ ‘ਤੇ ਗੰਭੀਰ ਸਵਾਲ ਖੜੇ ਹੋ ਗਏ ਹਨ। ਜਾਣਕਾਰੀ ਮੁਤਾਬਕ ਮਰੀਜ਼ ਨੂੰ ਤੁਰੰਤ ਖਾਣੇ ਦੀ ਲੋੜ ਸੀ, ਪਰ ਖਾਣਾ ਸਮੇਂ ‘ਤੇ ਨਾ ਮਿਲਣ ਕਾਰਨ ਉਸ ਦੀ ਹਾਲਤ ਬਿਗੜ ਗਈ।
ਰਿਪੋਰਟਾਂ ਅਨੁਸਾਰ 79 ਸਾਲਾ ਮਰੀਜ਼ ਖਾਣਾ ਲੱਭਣ ਲਈ ਵਾਰਡ ਤੋਂ ਬਾਹਰ ਨਿਕਲ ਕੇ ਹਸਪਤਾਲ ਦੀਆਂ ਸੀੜੀਆਂ ਵਾਲੇ ਹਿੱਸੇ ਤੱਕ ਪਹੁੰਚ ਗਿਆ। ਕੁਝ ਸਮੇਂ ਬਾਅਦ ਉਹ ਉਥੇ ਬੇਹੋਸ਼ ਹਾਲਤ ਵਿੱਚ ਮਿਲਿਆ। ਡਿਊਟੀ ‘ਤੇ ਮੌਜੂਦ ਡਾਕਟਰ ਨੇ ਉਸ ਦੀ ਜਾਂਚ ਕੀਤੀ, ਪਰ ਉਸ ਵੇਲੇ ਤੱਕ ਉਸ ਦੀ ਨਬਜ਼ ਨਹੀਂ ਚਲ ਰਹੀ ਸੀ।
ਸੀਸੀਟੀਵੀ ਫੁਟੇਜ ਤੋਂ ਪਤਾ ਲੱਗਾ ਕਿ ਮਰੀਜ਼ ਹਸਪਤਾਲ ਦੇ ਅੰਦਰ ਕਈ ਥਾਵਾਂ ‘ਤੇ ਗਿਆ ਸੀ ਅਤੇ ਖਾਣਾ ਲੱਭਣ ਲਈ ਵੈਂਡਿੰਗ ਮਸ਼ੀਨ ਦੇ ਨੇੜੇ ਵੀ ਪਹੁੰਚਿਆ ਸੀ।
ਇਸ ਘਟਨਾ ਤੋਂ ਬਾਅਦ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਮਰੀਜ਼ ਦੀ ਦੇਖਭਾਲ ਅਤੇ ਹਸਪਤਾਲ ਦੇ ਪ੍ਰਬੰਧਨ ‘ਤੇ ਸਵਾਲ ਉੱਠ ਰਹੇ ਹਨ ਕਿ ਜਰੂਰੀ ਸਮੇਂ ‘ਤੇ ਮਰੀਜ਼ ਨੂੰ ਲੋੜੀਂਦੀ ਸਹਾਇਤਾ ਕਿਉਂ ਨਹੀਂ ਮਿਲ ਸਕੀ।
ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਮਾਮਲੇ ਦੀ ਪੂਰੀ ਜਾਂਚ ਕੀਤੀ ਜਾ ਰਹੀ ਹੈ ਤਾਂ ਜੋ ਘਟਨਾ ਦੇ ਅਸਲ ਕਾਰਨਾਂ ਦਾ ਪਤਾ ਲੱਗ ਸਕੇ ਅਤੇ ਭਵਿੱਖ ਵਿੱਚ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨੂੰ ਰੋਕਿਆ ਜਾ ਸਕੇ।