ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੇ ਸ਼ਹਿਰ ਆਕਲੈਂਡ ਵਿੱਚ ਪਾਰਕਾਂ ਅਤੇ ਖੇਡ ਮੈਦਾਨਾਂ ਵਿੱਚ ਵਧ ਰਹੀ ਗ੍ਰਾਫ਼ਿਟੀ ਅਤੇ ਤੋੜਫੋੜ ਨੇ ਸ਼ਹਿਰੀ ਪ੍ਰਸ਼ਾਸਨ ਲਈ ਵੱਡੀ ਚਿੰਤਾ ਪੈਦਾ ਕਰ ਦਿੱਤੀ ਹੈ।
ਰਿਪੋਰਟ ਮੁਤਾਬਕ ਪਿਛਲੇ ਇੱਕ ਸਾਲ ਦੌਰਾਨ ਇਨ੍ਹਾਂ ਘਟਨਾਵਾਂ ਕਾਰਨ ਮੁਰੰਮਤ ਅਤੇ ਸਫਾਈ ‘ਤੇ $1.2 ਮਿਲੀਅਨ ਤੋਂ ਵੱਧ ਖਰਚਾ ਕਰਨਾ ਪਿਆ। ਸਾਲ 2024–2025 ਵਿੱਚ ਹੀ ਵੈਂਡਲਿਜ਼ਮ ਦੇ 1884 ਮਾਮਲੇ ਦਰਜ ਕੀਤੇ ਗਏ, ਜਿਨ੍ਹਾਂ ‘ਤੇ ਲਗਭਗ $634,000 ਖਰਚ ਹੋਇਆ।
ਇਸ ਤੋਂ ਇਲਾਵਾ ਸਿਰਫ਼ ਗ੍ਰਾਫ਼ਿਟੀ ਹਟਾਉਣ ਲਈ ਹੀ ਤਕਰੀਬਨ $650,000 ਖਰਚੇ ਗਏ, ਜਦਕਿ ਕੁੱਲ ਖਰਚਾ ਕੁਝ ਸੇਵਾਵਾਂ ਸਮੇਤ ਸਾਲਾਨਾ $4.5 ਮਿਲੀਅਨ ਤੱਕ ਪਹੁੰਚ ਜਾਂਦਾ ਹੈ।
ਸਭ ਤੋਂ ਵੱਡਾ ਨੁਕਸਾਨ ਦੱਖਣੀ ਆਕਲੈਂਡ ਦੇ ਇੱਕ ਪਾਰਕ ਵਿੱਚ ਅੱਗ ਲੱਗਣ ਦੀ ਘਟਨਾ ਕਾਰਨ ਹੋਇਆ, ਜਿਸਦੀ ਮੁਰੰਮਤ ‘ਤੇ ਕਰੀਬ $130,000 ਖਰਚ ਆਇਆ।
ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਤਰ੍ਹਾਂ ਦੀ ਤੋੜਫੋੜ ਨਾ ਸਿਰਫ਼ ਸਰਕਾਰੀ ਖਜ਼ਾਨੇ ‘ਤੇ ਬੋਝ ਪਾ ਰਹੀ ਹੈ, ਸਗੋਂ ਲੋਕਾਂ ਲਈ ਪਾਰਕਾਂ ਦੀ ਸੁਵਿਧਾ ਅਤੇ ਸੁਰੱਖਿਆ ‘ਤੇ ਵੀ ਅਸਰ ਪਾ ਰਹੀ ਹੈ। ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜਨਤਕ ਥਾਵਾਂ ਦੀ ਸੰਭਾਲ ਕਰਨ ਅਤੇ ਅਜਿਹੀਆਂ ਘਟਨਾਵਾਂ ਨੂੰ ਰੋਕਣ ਵਿੱਚ ਸਹਿਯੋਗ ਦੇਣ।
ਆਕਲੈਂਡ ਦੇ ਪਾਰਕਾਂ ਵਿੱਚ ਗ੍ਰਾਫ਼ਿਟੀ ਤੇ ਤੋੜਫੋੜ ਦਾ ਕਹਿਰ, ਲੱਖਾਂ ਡਾਲਰ ਦਾ ਨੁਕਸਾਨ
