ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ ਦੇ ਸਾਊਥ ਇਲਾਕੇ ਟਕਾਨਿਨੀ ਗੁਰਦੁਆਰਾ ਵਿੱਚ ਹੋਈ ਇੱਕ ਖਾਸ ਹੂਈ ਦੌਰਾਨ ਮਾਓਰੀ ਅਤੇ ਭਾਰਤੀ ਸਿੱਖ ਭਾਈਚਾਰੇ ਨੇ ਇਕਤਾ, ਸਹਿਯੋਗ ਅਤੇ ਸਮਾਜਿਕ ਸਾਂਝ ਲਈ ਆਪਣੀ ਵਚਨਬੱਧਤਾ ਦੁਹਰਾਈ।
ਇਹ ਇਕੱਠ ਹਾਲ ਹੀ ਵਿੱਚ ਟੌਰੰਗਾ ਅਤੇ ਸਾਊਥ ਆਕਲੈਂਡ ਵਿੱਚ ਸਿੱਖ ਨਗਰ ਕੀਰਤਨਾਂ ਦੌਰਾਨ ਹੋਈਆਂ ਰੁਕਾਵਟਾਂ ਤੋਂ ਬਾਅਦ ਕਰਵਾਇਆ ਗਿਆ, ਜਿੱਥੇ ਕੁਝ ਪ੍ਰਦਰਸ਼ਨਕਾਰੀਆਂ ਵੱਲੋਂ ਧਾਰਮਿਕ ਜਲੂਸਾਂ ਵਿੱਚ ਖਲਲ ਪਾਇਆ ਗਿਆ ਸੀ। ਨਗਰ ਕੀਰਤਨ ਸਿੱਖ ਧਰਮ ਦੀ ਮਹੱਤਵਪੂਰਨ ਰਸਮ ਹੈ, ਜਿਸ ਵਿੱਚ ਕੀਰਤਨ ਕਰਦਿਆਂ ਜਨਤਕ ਜਲੂਸ ਕੱਢੇ ਜਾਂਦੇ ਹਨ।
ਸੁਪਰੀਮ ਸਿੱਖ ਸੋਸਾਇਟੀ ਦੇ ਪ੍ਰਵਕਤਾ ਦਿਲਜੀਤ ਸਿੰਘ ਨੇ ਕਿਹਾ ਕਿ ਇਹ ਹੂਈ ਮਾਓਰੀ ਅਤੇ ਸਿੱਖ ਰਿਵਾਜਾਂ ਦੇ ਸਾਂਝੇ ਮੁੱਲਾਂ—ਕੋਟਾਹਿਤਾਂਗਾ (ਇਕਤਾ), ਮਨਾਕੀਤਾਂਗਾ (ਅਤਿਥੀ ਸਤਿਕਾਰ) ਅਤੇ ਵ੍ਹਾਨਾਊਂਗਾਤਾਂਗਾ (ਰਿਸ਼ਤੇ ਬਣਾਉਣਾ)—ਦਾ ਪ੍ਰਤੀਕ ਹੈ। ਉਨ੍ਹਾਂ ਕਿਹਾ ਕਿ ਦੋਵੇਂ ਭਾਈਚਾਰੇ ਯੋਧਾ ਪਰੰਪਰਾਵਾਂ ਨਾਲ ਜੁੜੇ ਹਨ ਅਤੇ ਇੱਕ ਪਰਮਾਤਮਾ ‘ਤੇ ਵਿਸ਼ਵਾਸ ਰੱਖਦੇ ਹਨ।
ਹੂਈ ਦੇ ਸਹਿ-ਆਯੋਜਕ ਅਤੇ ਸਾਬਕਾ ਪੁਲਿਸ ਡਿਪਟੀ ਕਮਿਸ਼ਨਰ Wally Haumaha ਨੇ ਕਿਹਾ ਕਿ ਇਹ ਦਿਨ ਰਿਸ਼ਤਿਆਂ ਨੂੰ ਦੁਬਾਰਾ ਜੋੜਨ ਲਈ ਮਹੱਤਵਪੂਰਨ ਹੈ। ਉਨ੍ਹਾਂ ਨੇ ਇਤਿਹਾਸਕ ਸਬੰਧਾਂ ਦਾ ਹਵਾਲਾ ਦਿੰਦਿਆਂ ਦੱਸਿਆ ਕਿ 1910 ਦੇ ਦਹਾਕੇ ਵਿੱਚ ਪੰਜਾਬ ਤੋਂ ਆਏ Munsha Singh Bassi ਨੇ ਮਾਓਰੀ ਮਹਿਲਾ ਨਾਲ ਵਿਆਹ ਕਰਕੇ ਦੋਵੇਂ ਸਮੁਦਾਇਆਂ ਵਿੱਚ ਪਹਿਲੀ ਜਾਣੀ-ਪਛਾਣੀ ਕੜੀ ਬਣਾਈ ਸੀ।
ਹੂਈ ਵਿੱਚ ਸ਼ਾਮਲ ਲੋਕਾਂ ਨੇ ਇਸ ਇਕੱਠ ਨੂੰ ਸੰਸਕ੍ਰਿਤਿਕ ਸਾਂਝ ਅਤੇ ਪਹਿਚਾਣ ਨਾਲ ਜੁੜਨ ਦਾ ਮੌਕਾ ਦੱਸਿਆ। ਕੁਝ ਹਿਸੇਦਾਰਾਂ ਨੇ ਆਪਣੇ ਪੂਰਖਾਂ ਦੀ ਵਿਰਾਸਤ ਨੂੰ ਯਾਦ ਕਰਦਿਆਂ ਸਿੱਖ ਧਰਮ ਅਤੇ ਮਾਓਰੀ ਸੰਸਕ੍ਰਿਤੀ ਬਾਰੇ ਹੋਰ ਜਾਣਨ ਦੀ ਗੱਲ ਕੀਤੀ।
ਸਾਊਥ ਆਕਲੈਂਡ ਦੇ ਮਾਓਰੀ ਨੇਤਾਵਾਂ ਨੇ ਵੀ ਸਿੱਖ ਭਾਈਚਾਰੇ ਨਾਲ ਲੰਬੇ ਸਮੇਂ ਤੋਂ ਚੱਲਦੇ ਸਹਿਯੋਗ ਨੂੰ ਯਾਦ ਕਰਦਿਆਂ ਕਿਹਾ ਕਿ ਦੋਵੇਂ ਸਮੁਦਾਇ ਹਮੇਸ਼ਾ ਇਕ-ਦੂਜੇ ਦੀ ਮਦਦ ਕਰਦੇ ਆਏ ਹਨ। ਉਨ੍ਹਾਂ ਨੇ ਜ਼ੋਰ ਦਿੱਤਾ ਕਿ ਧਰਮ ਜਾਂ ਰੰਗ ਤੋਂ ਉੱਪਰ ਉੱਠ ਕੇ ਹਰ ਕਿਸੇ ਦਾ ਸਵਾਗਤ ਕਰਨਾ ਹੀ ਨਿਊਜ਼ੀਲੈਂਡ ਦੀ ਖੂਬਸੂਰਤੀ ਹੈ।
ਆਕਲੈਂਡ ਵਿੱਚ ਮਾਓਰੀ–ਸਿੱਖ ਇਕਤਾ ਦਾ ਪ੍ਰਦਰਸ਼ਨ, ਹੂਈ ਰਾਹੀਂ ਸਮਾਜਿਕ ਸਾਂਝ ਦਾ ਸੰਦੇਸ਼
