ਵੈਲਿੰਗਟਨ/ਗਿਸਬਰਨ: (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੇ ਸਰਕਾਰੀ ਸਿਹਤ ਖੇਤਰ ਵਿੱਚ ਆਈਟੀ ਮਾਹਿਰਾਂ ਦੀਆਂ ਨੌਕਰੀਆਂ ਵਿੱਚ ਕੀਤੀਆਂ ਜਾ ਰਹੀਆਂ ਕਟੌਤੀਆਂ ਨੂੰ ਲੈ ਕੇ ਪਬਲਿਕ ਸਰਵਿਸ ਐਸੋਸੀਏਸ਼ਨ ਨੇ ਗੰਭੀਰ ਚਿੰਤਾ ਜਤਾਈ ਹੈ। ਪਬਲਿਕ ਸਰਵਿਸ ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਹਾਲ ਹੀ ਵਿੱਚ ਆਨਲਾਈਨ ਸਿਹਤ ਪਲੇਟਫਾਰਮ ManageMyHealth ਵਿੱਚ ਹੋਈ ਪ੍ਰਾਈਵੇਸੀ ਬ੍ਰੀਚ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਡਿਜ਼ਿਟਲ ਅਤੇ IT ਤਜਰਬੇਕਾਰਾਂ ਦੀ ਘਾਟ ਸਿਹਤ ਪ੍ਰਣਾਲੀ ਨੂੰ ਵੱਡੇ ਖ਼ਤਰੇ ਵਿੱਚ ਧੱਕ ਰਹੀ ਹੈ।
ਪਬਲਿਕ ਸਰਵਿਸ ਐਸੋਸੀਏਸ਼ਨ ਅਨੁਸਾਰ, ਸਰਕਾਰ ਵੱਲੋਂ ਸਿਹਤ ਸੇਵਾਵਾਂ ਵਿੱਚ ਆਈਟੀ ਅਤੇ ਡਿਜ਼ਿਟਲ ਮਾਹਿਰਾਂ ਦੀਆਂ ਪੋਸਟਾਂ ਘਟਾਉਣ ਕਾਰਨ ਡਾਟਾ ਸੁਰੱਖਿਆ ਵਰਗੇ ਸੰਵੇਦਨਸ਼ੀਲ ਮਾਮਲਿਆਂ ਵਿੱਚ ਸਿਸਟਮ ਕਮਜ਼ੋਰ ਹੋ ਰਿਹਾ ਹੈ। ਪੁਰਾਣੇ ਅਤੇ ਜਟਿਲ ਸਿਸਟਮਾਂ ਦੀ ਸੁਰੱਖਿਆ ਲਈ ਅਨੁਭਵੀ ਮਾਹਿਰਾਂ ਦੀ ਲੋੜ ਹੁੰਦੀ ਹੈ, ਪਰ ਕਟੌਤੀਆਂ ਕਾਰਨ ਇਹ ਸਮਰੱਥਾ ਘਟਦੀ ਜਾ ਰਹੀ ਹੈ।
ਸੰਗਠਨ ਨੇ ਯਾਦ ਦਿਵਾਇਆ ਕਿ 2021 ਵਿੱਚ ਵਾਇਕਾਟੋ ਹਸਪਤਾਲ ‘ਤੇ ਹੋਇਆ ਰੈਨਸਮਵੇਅਰ ਹਮਲਾ ਪਹਿਲਾਂ ਹੀ ਚੇਤਾਵਨੀ ਦੇ ਚੁੱਕਾ ਸੀ, ਪਰ ਉਸ ਤੋਂ ਸਿੱਖ ਲੈਣ ਦੀ ਬਜਾਏ ਹੁਣ ਮੁੜ ਉਹੀ ਗਲਤੀਆਂ ਦੁਹਰਾਈਆਂ ਜਾ ਰਹੀਆਂ ਹਨ। ਪਬਲਿਕ ਸਰਵਿਸ ਐਸੋਸੀਏਸ਼ਨ ਨੇ ਪ੍ਰਾਈਵੇਸੀ ਕਮਿਸ਼ਨਰ ਤੋਂ ਮੰਗ ਕੀਤੀ ਹੈ ਕਿ ਸਿਹਤ ਖੇਤਰ ਵਿੱਚ ਹੋ ਰਹੀਆਂ ਨੌਕਰੀ ਕਟੌਤੀਆਂ ਦੇ ਡਾਟਾ ਸੁਰੱਖਿਆ ‘ਤੇ ਪੈਣ ਵਾਲੇ ਪ੍ਰਭਾਵਾਂ ਦੀ ਜਾਂਚ ਕੀਤੀ ਜਾਵੇ।
ਉੱਥੇ ਹੀ ਸਿਹਤ ਮੰਤਰੀ ਸਿਮਿਓਨ ਬ੍ਰਾਊਨ ਨੇ ਕਿਹਾ ਹੈ ਕਿ ਸਰਕਾਰ ਅਤੇ ਸੰਬੰਧਤ ਏਜੰਸੀਆਂ ManageMyHealth ਡਾਟਾ ਲੀਕ ਦੀ ਪੂਰੀ ਜਾਂਚ ਕਰ ਰਹੀਆਂ ਹਨ ਅਤੇ ਮਰੀਜ਼ਾਂ ਦੀ ਨਿੱਜੀ ਜਾਣਕਾਰੀ ਦੀ ਰੱਖਿਆ ਲਈ ਜ਼ਰੂਰੀ ਕਦਮ ਚੁੱਕੇ ਜਾ ਰਹੇ ਹਨ।
ਪਬਲਿਕ ਸਰਵਿਸ ਐਸੋਸੀਏਸ਼ਨ ਦਾ ਸਾਫ਼ ਕਹਿਣਾ ਹੈ ਕਿ ਜੇ ਡਿਜ਼ਿਟਲ ਸੁਰੱਖਿਆ ਨੂੰ ਗੰਭੀਰਤਾ ਨਾਲ ਨਾ ਲਿਆ ਗਿਆ, ਤਾਂ ਭਵਿੱਖ ਵਿੱਚ ਅਜਿਹੀਆਂ ਡਾਟਾ ਲੀਕ ਘਟਨਾਵਾਂ ਸਿਹਤ ਪ੍ਰਣਾਲੀ ਅਤੇ ਜਨਤਾ ਦੇ ਭਰੋਸੇ ਲਈ ਵੱਡਾ ਖ਼ਤਰਾ ਬਣ ਸਕਦੀਆਂ ਹਨ।
ਸਿਹਤ ਖੇਤਰ ਵਿੱਚ IT ਮਾਹਿਰਾਂ ਦੀਆਂ ਕਟੌਤੀਆਂ ਖ਼ਤਰਨਾਕ, ਡਾਟਾ ਲੀਕ ਨੇ ਖੋਲ੍ਹੀ ਸਿਸਟਮ ਦੀ ਕਮਜ਼ੋਰੀ: PSA
