ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੇ ਲੋਅਰ ਹੱਟ ਸ਼ਹਿਰ ਵਿੱਚ ਸਥਿਤ ਮੈਲਿੰਗ ਰੇਲਵੇ ਸਟੇਸ਼ਨ ‘ਤੇ ਵੱਡਾ ਢਾਂਚਾਗਤ ਬਦਲਾਅ ਸ਼ੁਰੂ ਹੋ ਗਿਆ ਹੈ। ਸਟੇਸ਼ਨ ਦੇ ਬੰਦ ਹੋਣ ਤੋਂ ਬਾਅਦ ਹੁਣ ਇੱਥੋਂ ਟਰੇਨ ਦੀਆਂ ਪਟੜੀਆਂ ਅਤੇ ਉਪਰਲੀਆਂ ਬਿਜਲੀ ਲਾਈਨਾਂ ਪੂਰੀ ਤਰ੍ਹਾਂ ਉਖਾੜ ਦਿੱਤੀਆਂ ਗਈਆਂ ਹਨ, ਜਿਸ ਨਾਲ ਇਹ ਸਟੇਸ਼ਨ ਅਗਲੇ ਕਈ ਸਾਲਾਂ ਲਈ ਨਕਸ਼ੇ ਤੋਂ ਹਟਦਾ ਨਜ਼ਰ ਆ ਰਿਹਾ ਹੈ।
KiwiRail ਵੱਲੋਂ ਪੁਸ਼ਟੀ ਕੀਤੀ ਗਈ ਹੈ ਕਿ ਮੈਲਿੰਗ ਅਤੇ ਵੈਸਟਰਨ ਹੱਟ ਸਟੇਸ਼ਨਾਂ ਦਰਮਿਆਨ ਸਾਰੇ ਟਰੇਕਸ ਅਤੇ ਓਵਰਹੈੱਡ ਲਾਈਨਾਂ ਹਟਾ ਦਿੱਤੀਆਂ ਗਈਆਂ ਹਨ। ਇਹ ਕੰਮ ਸਰਕਾਰ ਦੇ ਮਹੱਤਵਾਕਾਂਕਸ਼ੀ $1.5 ਬਿਲੀਅਨ RiverLink ਪ੍ਰੋਜੈਕਟ ਦਾ ਹਿੱਸਾ ਹੈ, ਜਿਸਦਾ ਮਕਸਦ ਰਾਜ ਮਾਰਗ–2 (State Highway 2) ਦੇ ਇੰਟਰਚੇਂਜ ਨੂੰ ਨਵੀਂ ਤਰ੍ਹਾਂ ਵਿਕਸਿਤ ਕਰਨਾ ਅਤੇ ਹੱਟ ਦਰਿਆ ਨਾਲ ਲੱਗਦੇ ਖੇਤਰ ਦੀ ਸੁਰੱਖਿਆ ਵਧਾਉਣਾ ਹੈ।
ਪ੍ਰੋਜੈਕਟ ਤਹਿਤ ਮੈਲਿੰਗ ਸਟੇਸ਼ਨ ਨੂੰ ਆਪਣੀ ਮੌਜੂਦਾ ਥਾਂ ਤੋਂ ਲਗਭਗ 300 ਮੀਟਰ ਦੱਖਣ ਵੱਲ ਸ਼ਿਫਟ ਕੀਤਾ ਜਾਵੇਗਾ। ਨਵਾਂ ਸਟੇਸ਼ਨ ਸ਼ਹਿਰ ਦੇ ਕੇਂਦਰ ਨਾਲ ਜੁੜਨ ਲਈ ਇੱਕ ਆਧੁਨਿਕ ਫੁੱਟਬ੍ਰਿਜ ਨਾਲ ਲੈਸ ਹੋਵੇਗਾ। ਅਧਿਕਾਰੀਆਂ ਅਨੁਸਾਰ, ਨਵੀਂ ਸਟੇਸ਼ਨ ਬਿਲਡਿੰਗ ਦੇ 2028 ਦੇ ਅੰਤ ਤੱਕ ਤਿਆਰ ਹੋਣ ਦੀ ਉਮੀਦ ਹੈ।
ਇਸ ਦੌਰਾਨ ਮੈਲਿੰਗ ਲਾਈਨ ਦੀਆਂ ਸਾਰੀਆਂ ਟਰੇਨ ਸੇਵਾਵਾਂ ਵੈਸਟਰਨ ਹੱਟ ਸਟੇਸ਼ਨ ‘ਤੇ ਹੀ ਸਮਾਪਤ ਹੋਣਗੀਆਂ। Greater Wellington Regional Council ਵੱਲੋਂ ਯਾਤਰੀਆਂ ਲਈ ਬਦਲਵੇਂ ਜਨਤਕ ਆਵਾਜਾਈ ਪ੍ਰਬੰਧ ਕੀਤੇ ਜਾ ਰਹੇ ਹਨ, ਕਿਉਂਕਿ ਮੈਲਿੰਗ ਸਟੇਸ਼ਨ ਦੇ ਬੰਦ ਹੋਣ ਨਾਲ ਰੋਜ਼ਾਨਾ ਸੈਂਕੜੇ ਯਾਤਰੀ ਪ੍ਰਭਾਵਿਤ ਹੋ ਰਹੇ ਹਨ।
ਰਿਵਰਲਿੰਕ ਪ੍ਰੋਜੈਕਟ ਨਾਲ ਸਿਰਫ਼ ਆਵਾਜਾਈ ਢਾਂਚੇ ਨੂੰ ਹੀ ਨਹੀਂ, ਸਗੋਂ ਬਾੜ ਰੋਕੂ ਪ੍ਰਬੰਧਾਂ ਨੂੰ ਮਜ਼ਬੂਤ ਕਰਨ ਅਤੇ ਹੱਟ ਦਰਿਆ ਦੇ ਆਲੇ-ਦੁਆਲੇ ਸ਼ਹਿਰੀ ਵਿਕਾਸ ਨੂੰ ਵੀ ਨਵੀਂ ਦਿਸ਼ਾ ਮਿਲਣ ਦੀ ਉਮੀਦ ਜਤਾਈ ਜਾ ਰਹੀ ਹੈ।
ਮੈਲਿੰਗ ਰੇਲਵੇ ਸਟੇਸ਼ਨ ‘ਤੇ ਪਟੜੀਆਂ ਉਖਾੜੀਆਂ ਗਈਆਂ
