ਆਕਲੈਂਡ (ਐੱਨ ਜੈੱਡ ਤਸਵੀਰ) ਇੱਕ ਬਜ਼ੁਰਗ ਮਹਿਲਾ ਨੂੰ ਆਪਣੇ ਹੀ ਪੁੱਤਰ ਕਾਰਨ ਬੈਂਕ ਖਾਤੇ ਤੱਕ ਪਹੁੰਚ ਨਾ ਮਿਲਣ ’ਤੇ ਨਿਆਂ ਮਿਲਿਆ ਹੈ। ਬੈਂਕਿੰਗ ਓਮਬੁਡਸਮੈਨ ਨੇ ਮਾਮਲੇ ਦੀ ਸੁਣਵਾਈ ਤੋਂ ਬਾਅਦ ਸੰਬੰਧਿਤ ਬੈਂਕ ਨੂੰ ਮਹਿਲਾ ਨੂੰ $10,000 ਮੁਆਵਜ਼ਾ ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ।
ਖ਼ਬਰ ਮੁਤਾਬਕ, 84 ਸਾਲਾ ਮਹਿਲਾ ਨੇ ਕੁਝ ਸਾਲ ਪਹਿਲਾਂ ਆਪਣੀ ਜਾਇਦਾਦ ਵੇਚ ਕੇ ਲਗਭਗ ਅੱਧਾ ਮਿਲੀਅਨ ਡਾਲਰ ਬੈਂਕ ਵਿੱਚ ਜਮ੍ਹਾਂ ਕਰਵਾਏ ਸਨ। ਰੋਜ਼ਾਨਾ ਬੈਂਕਿੰਗ ਵਿੱਚ ਮਦਦ ਲਈ ਉਸ ਨੇ ਆਪਣੇ ਪੁੱਤਰ ਨੂੰ ਖਾਤੇ ਨਾਲ ਜੋੜਿਆ ਅਤੇ ਉਸ ਨੂੰ ਪਾਵਰ ਆਫ਼ ਅਟਾਰਨੀ ਵੀ ਦਿੱਤੀ। ਮਹਿਲਾ ਦਾ ਕਹਿਣਾ ਸੀ ਕਿ ਉਸ ਦੀ ਸਪਸ਼ਟ ਹਦਾਇਤ ਸੀ ਕਿ ਕੋਈ ਵੀ ਵੱਡਾ ਫੈਸਲਾ ਉਸ ਦੀ ਮਨਜ਼ੂਰੀ ਨਾਲ ਹੀ ਕੀਤਾ ਜਾਵੇ।
ਪਰ ਬਾਅਦ ਵਿੱਚ ਪੁੱਤਰ ਵੱਲੋਂ ਖਾਤੇ ਨਾਲ ਜੁੜੇ ਫੈਸਲਿਆਂ ਕਾਰਨ ਬੈਂਕ ਨੇ ਰਕਮ ’ਤੇ ਰੋਕ ਲਾ ਦਿੱਤੀ, ਜਿਸ ਨਾਲ ਮਹਿਲਾ ਆਪਣਾ ਹੀ ਪੈਸਾ ਵਰਤਣ ਤੋਂ ਵਾਂਝੀ ਰਹਿ ਗਈ। ਇਸ ਘਟਨਾ ਨੇ ਉਸ ਨੂੰ ਮਾਨਸਿਕ ਤਣਾਅ ਅਤੇ ਭਾਰੀ ਅਸੁਵਿਧਾ ਵਿੱਚ ਪਾ ਦਿੱਤਾ।
ਮਾਮਲਾ ਬੈਂਕਿੰਗ ਓਮਬੁਡਸਮੈਨ ਤੱਕ ਪਹੁੰਚਿਆ, ਜਿੱਥੇ ਫੈਸਲਾ ਦਿੱਤਾ ਗਿਆ ਕਿ ਬੈਂਕ ਵੱਲੋਂ ਖਾਤਾ ਬਣਾਉਂਦੇ ਸਮੇਂ ਮਹਿਲਾ ਨੂੰ ਇਸ ਦੇ ਨਤੀਜਿਆਂ ਅਤੇ ਖਤਰਨਾਂ ਬਾਰੇ ਪੂਰੀ ਤਰ੍ਹਾਂ ਨਹੀਂ ਸਮਝਾਇਆ ਗਿਆ। ਇਸ ਲਾਪਰਵਾਹੀ ਲਈ ਬੈਂਕ ਨੂੰ ਜ਼ਿੰਮੇਵਾਰ ਠਹਿਰਾਇਆ ਗਿਆ।
ਫੈਸਲੇ ਤਹਿਤ ਮਹਿਲਾ ਨੂੰ ਹੋਈ ਸ਼ਰਮਿੰਦਗੀ ਅਤੇ ਤਕਲੀਫ਼ ਦੇ ਬਦਲੇ $10,000 ਦਾ ਮੁਆਵਜ਼ਾ ਦਿੱਤਾ ਗਿਆ। ਇਹ ਮਾਮਲਾ ਬਜ਼ੁਰਗਾਂ ਦੀ ਵਿੱਤੀ ਸੁਰੱਖਿਆ ਅਤੇ ਬੈਂਕਾਂ ਦੀ ਜ਼ਿੰਮੇਵਾਰੀ ਨੂੰ ਲੈ ਕੇ ਇਕ ਮਹੱਤਵਪੂਰਨ ਚੇਤਾਵਨੀ ਵਜੋਂ ਵੇਖਿਆ ਜਾ ਰਿਹਾ ਹੈ।
ਪੁੱਤਰ ਵੱਲੋਂ ਮਾਂ ਦੀ ਬੈਂਕ ਰਕਮ ’ਤੇ ਰੋਕ, ਬੈਂਕ ਨੂੰ $10,000 ਮੁਆਵਜ਼ਾ ਦੇਣ ਦਾ ਹੁਕਮ
