ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ — ਜਿੱਥੇ ਦੁਨੀਆ ਭਰ ਵਿੱਚ ਆਰਥਿਕ ਅਨਿਸ਼ਚਿਤਤਾ, ਵਪਾਰਕ ਤਣਾਅ ਅਤੇ ਖਪਤ ਵਿੱਚ ਕਮੀ ਕਾਰਨ ਵਾਈਨ ਉਦਯੋਗ ਦਬਾਅ ਹੇਠ ਹੈ, ਉਥੇ ਨਿਊਜ਼ੀਲੈਂਡ ਦੀ ਵਾਈਨ ਨਿਰੀਆਤ ਏਸ਼ੀਆਈ ਬਾਜ਼ਾਰਾਂ ਵਿੱਚ ਤੇਜ਼ੀ ਨਾਲ ਵਧੀ ਹੈ, ਜੋ ਉਦਯੋਗ ਲਈ ਰਾਹਤ ਭਰੀ ਖ਼ਬਰ ਮੰਨੀ ਜਾ ਰਹੀ ਹੈ।
ਤਾਜ਼ਾ ਅੰਕੜਿਆਂ ਮੁਤਾਬਕ, ਪਿਛਲੇ 12 ਮਹੀਨਿਆਂ ਦੌਰਾਨ ਚੀਨ ਲਈ ਨਿਊਜ਼ੀਲੈਂਡ ਵਾਈਨ ਨਿਰੀਆਤ 47 ਫੀਸਦੀ ਵਧ ਕੇ 56 ਮਿਲੀਅਨ ਡਾਲਰ ਤੱਕ ਪਹੁੰਚ ਗਈ ਹੈ, ਜਦਕਿ ਦੱਖਣੀ ਕੋਰੀਆ ਨੂੰ ਨਿਰੀਆਤ 92 ਫੀਸਦੀ ਦੇ ਵੱਡੇ ਉਛਾਲ ਨਾਲ 44 ਮਿਲੀਅਨ ਡਾਲਰ ਹੋ ਗਈ ਹੈ। ਇਹ ਵਾਧਾ ਉਸ ਸਮੇਂ ਦਰਜ ਕੀਤਾ ਗਿਆ ਹੈ ਜਦੋਂ ਕਈ ਰਵਾਇਤੀ ਬਾਜ਼ਾਰਾਂ ਵਿੱਚ ਮੰਗ ਘੱਟ ਰਹੀ ਹੈ।
ਉਦਯੋਗ ਮਾਹਿਰਾਂ ਦਾ ਕਹਿਣਾ ਹੈ ਕਿ ਨਿਊਜ਼ੀਲੈਂਡ ਦੀਆਂ ਖੁਸ਼ਬੂਦਾਰ ਚਿੱਟੀਆਂ ਵਾਈਨਾਂ, ਖ਼ਾਸ ਕਰਕੇ ਸਾਵਿਨਿਯੋਂ ਬਲਾਂਕ, ਏਸ਼ੀਆਈ ਖਪਤਕਾਰਾਂ ਦੀ ਪਸੰਦ ਨਾਲ ਬਹੁਤ ਚੰਗੀ ਤਰ੍ਹਾਂ ਮੇਲ ਖਾਂਦੀਆਂ ਹਨ। ਮਾਰਲਬਰੋ ਸਥਿਤ te Pā Wines ਦੀ ਮਿਕੇਲਾ ਡੈਨਿਸਨ-ਬਰਗੈਸ ਅਨੁਸਾਰ, ਚੀਨ ਅਤੇ ਕੋਰੀਆ ਵਰਗੇ ਦੇਸ਼ਾਂ ਵਿੱਚ ਕੀਵੀ ਵਾਈਨ ਦੀ ਪਛਾਣ ਅਤੇ ਮੰਗ ਲਗਾਤਾਰ ਵਧ ਰਹੀ ਹੈ।
ਹਾਲਾਂਕਿ, ਉਦਯੋਗ ਅੱਗੇ ਚੁਣੌਤੀਆਂ ਹਾਲੇ ਵੀ ਕਾਇਮ ਹਨ। 2025 ਦੀ ਫਸਲ ਮਜ਼ਬੂਤ ਰਹਿਣ ਦੇ ਬਾਵਜੂਦ, ਮੰਗ ਬਾਰੇ ਅਸਪਸ਼ਟਤਾ ਕਾਰਨ ਕਈ ਥਾਵਾਂ ‘ਤੇ ਅੰਗੂਰ ਬਾਗਾਂ ਵਿੱਚ ਹੀ ਛੱਡਣੇ ਪਏ। ਇਸ ਤੋਂ ਇਲਾਵਾ, ਉਤਪਾਦਨ, ਮਜ਼ਦੂਰੀ ਅਤੇ ਆਵਾਜਾਈ ਦੇ ਵਧਦੇ ਖ਼ਰਚੇ ਵੀ ਨਿਰਿਆਤਕਾਰਾਂ ਲਈ ਚਿੰਤਾ ਦਾ ਵਿਸ਼ਾ ਬਣੇ ਹੋਏ ਹਨ।
ਨਿਊਜ਼ੀਲੈਂਡ ਵਾਈਨਗ੍ਰੋਵਰਜ਼ ਦਾ ਕਹਿਣਾ ਹੈ ਕਿ ਭਵਿੱਖ ਵਿੱਚ ਉਦਯੋਗ ਦਾ ਧਿਆਨ ਨਵੇਂ ਅਤੇ ਉਭਰਦੇ ਬਾਜ਼ਾਰਾਂ ਵਿੱਚ ਪੈਰ ਪੱਕੇ ਕਰਨ ‘ਤੇ ਰਹੇਗਾ। ਇਸ ਕੜੀ ਤਹਿਤ 2027 ਵਿੱਚ ਮਾਰਲਬਰੋ ‘ਚ ਹੋਣ ਵਾਲਾ ਅੰਤਰਰਾਸ਼ਟਰੀ ਸਾਵਿਨਿਯੋਂ ਬਲਾਂਕ ਸੰਮੇਲਨ ਨਿਊਜ਼ੀਲੈਂਡ ਵਾਈਨ ਨੂੰ ਵਿਸ਼ਵ ਪੱਧਰ ‘ਤੇ ਹੋਰ ਮਜ਼ਬੂਤ ਪਛਾਣ ਦਿਵਾਉਣ ਦੀ ਉਮੀਦ ਜਗਾ ਰਿਹਾ ਹੈ।
ਕੁੱਲ ਮਿਲਾ ਕੇ, ਵਿਸ਼ਵ ਪੱਧਰ ਦੀ ਮੰਦ੍ਹੀ ਅਤੇ ਬਦਲਦੇ ਵਪਾਰਕ ਹਾਲਾਤਾਂ ਦੇ ਬਾਵਜੂਦ, ਏਸ਼ੀਆਈ ਬਾਜ਼ਾਰਾਂ ਵਿੱਚ ਮਿਲ ਰਹੀ ਕਾਮਯਾਬੀ ਨੇ ਨਿਊਜ਼ੀਲੈਂਡ ਵਾਈਨ ਉਦਯੋਗ ਲਈ ਨਵੀਂ ਆਸ ਪੈਦਾ ਕੀਤੀ ਹੈ।
ਗਲੋਬਲ ਉਥਲ–ਪੁਥਲ ਵਿਚਕਾਰ ਏਸ਼ੀਆਈ ਬਾਜ਼ਾਰਾਂ ‘ਚ ਨਿਊਜ਼ੀਲੈਂਡ ਵਾਈਨ ਦੀ ਮੰਗ ਚੜ੍ਹਦੀ ਕਲਾ ‘ਚ
