ਆਕਲੈਨਡ (ਐੱਨ ਜੈੱਡ ਤਸਵੀਰ) ਸੰਯੁਕਤ ਰਾਜ ਅਮਰੀਕਾ ਵਿੱਚ ਇੱਕ ICU ਨਰਸ ਦੀ ਗੋਲੀ ਮਾਰ ਕੇ ਹਤਿਆ ਕੀਤੇ ਜਾਣ ਦੀ ਘਟਨਾ ‘ਤੇ ਨਿਊਜ਼ੀਲੈਂਡ ਨਰਸਜ਼ ਆਰਗੇਨਾਈਜ਼ੇਸ਼ਨ (NZNO) ਨੇ ਗਹਿਰਾ ਦੁੱਖ ਅਤੇ ਰੋਸ ਜਤਾਇਆ ਹੈ। ਸੰਗਠਨ ਨੇ ਇਸ ਘਟਨਾ ਨੂੰ “ਚਿੰਤਾਜਨਕ ਅਤੇ ਨਿੰਦਣਯੋਗ” ਕਰਾਰ ਦਿੰਦਿਆਂ ਅਮਰੀਕੀ ਸਰਕਾਰ ਦੀ ਕਾਰਵਾਈ ‘ਤੇ ਸਵਾਲ ਖੜੇ ਕੀਤੇ ਹਨ।
ਮ੍ਰਿਤਕ ਦੀ ਪਛਾਣ ਐਲੈਕਸ ਪ੍ਰੈੱਟੀ (37) ਵਜੋਂ ਹੋਈ ਹੈ, ਜੋ ਅਮਰੀਕੀ ਡਿਪਾਰਟਮੈਂਟ ਆਫ ਵੈਟਰਨਜ਼ ਅਫੇਅਰਜ਼ ਵਿੱਚ ਇੱਕ ICU ਨਰਸ ਦੇ ਤੌਰ ‘ਤੇ ਸੇਵਾ ਨਿਭਾ ਰਿਹਾ ਸੀ। ਰਿਪੋਰਟਾਂ ਮੁਤਾਬਕ, 24 ਜਨਵਰੀ ਨੂੰ ਮਿਨੀਐਪੋਲਿਸ ਸ਼ਹਿਰ ਵਿੱਚ ਇੱਕ ਪ੍ਰਦਰਸ਼ਨ ਦੌਰਾਨ ਫੈਡਰਲ ਇਮੀਗ੍ਰੇਸ਼ਨ ਏਜੰਟਾਂ ਨਾਲ ਹੋਈ ਝੜਪ ਵਿੱਚ ਉਸ ਨੂੰ ਗੋਲੀਆਂ ਮਾਰ ਦਿੱਤੀਆਂ ਗਈਆਂ।
ਮਿਲੀ ਜਾਣਕਾਰੀ ਅਨੁਸਾਰ, ਘਟਨਾ ਵੇਲੇ ਪ੍ਰੈੱਟੀ ਟ੍ਰੈਫਿਕ ਨਿਯੰਤਰਣ ਵਿੱਚ ਮਦਦ ਕਰ ਰਿਹਾ ਸੀ। ਦਾਅਵਾ ਕੀਤਾ ਗਿਆ ਹੈ ਕਿ ਏਜੰਟਾਂ ਨੇ ਪਹਿਲਾਂ ਉਸ ‘ਤੇ ਪੇਪਰ ਸਪ੍ਰੇ ਵਰਤਿਆ, ਉਸ ਨੂੰ ਜ਼ਮੀਨ ‘ਤੇ ਸੁੱਟਿਆ ਅਤੇ ਬਾਅਦ ਵਿੱਚ ਕਈ ਗੋਲੀਆਂ ਚਲਾਈਆਂ। ਘਟਨਾ ਨਾਲ ਸਬੰਧਤ ਵੀਡੀਓ ਫੁਟੇਜ ਵਿੱਚ ਉਸ ਨੂੰ ਨਿਰਅਸਤ੍ਰ ਦਿਖਾਇਆ ਗਿਆ ਹੈ, ਜਿਸ ਨਾਲ ਅਧਿਕਾਰੀਆਂ ਦੀ ਕਾਰਵਾਈ ‘ਤੇ ਹੋਰ ਸਵਾਲ ਖੜੇ ਹੋ ਰਹੇ ਹਨ।
NZNO ਨੇ ਆਪਣੇ ਬਿਆਨ ਵਿੱਚ ਕਿਹਾ ਹੈ ਕਿ ਸਿਹਤ ਕਰਮਚਾਰੀ ਸਮਾਜ ਦੀ ਸੇਵਾ ਅਤੇ ਲੋਕਾਂ ਦੀ ਜਾਨ ਬਚਾਉਣ ਲਈ ਕੰਮ ਕਰਦੇ ਹਨ ਅਤੇ ਅਜਿਹੀ ਹਿੰਸਾ ਕਿਸੇ ਵੀ ਸਥਿਤੀ ਵਿੱਚ ਕਬੂਲਯੋਗ ਨਹੀਂ। ਸੰਗਠਨ ਨੇ ਅਮਰੀਕਾ ਵਿੱਚ ਸਿਹਤਕਰਮੀਆਂ ਅਤੇ ਆਮ ਨਾਗਰਿਕਾਂ ਦੀ ਸੁਰੱਖਿਆ ਨੂੰ ਲੈ ਕੇ ਗੰਭੀਰ ਚਿੰਤਾ ਪ੍ਰਗਟ ਕੀਤੀ ਹੈ।
ਇਸ ਘਟਨਾ ਤੋਂ ਬਾਅਦ ਅਮਰੀਕਾ ਵਿੱਚ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੀ ਕਾਰਵਾਈ ਅਤੇ ਉਨ੍ਹਾਂ ਦੀ ਜਵਾਬਦੇਹੀ ਬਾਰੇ ਮੁੜ ਚਰਚਾ ਛਿੜ ਗਈ ਹੈ। ਮਾਮਲੇ ਦੀ ਜਾਂਚ ਜਾਰੀ ਦੱਸੀ ਜਾ ਰਹੀ ਹੈ।
ਅਮਰੀਕਾ ਵਿੱਚ ICU ਨਰਸ ਦੀ ਮੌਤ ‘ਤੇ ਨਿਊਜ਼ੀਲੈਂਡ ਨਰਸਜ਼ ਸੰਗਠਨ ਦਾ ਸਖਤ ਰੋਸ
