ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੀ ਸਭ ਤੋਂ ਵੱਡੀ ਬੈਂਕ ANZ ਨੇ ਘਰੇਲੂ ਕਰਜ਼ਿਆਂ ਦੀਆਂ ਸੂਦ ਦਰਾਂ ਵਿੱਚ ਮਿਲੀ-ਜੁਲੀ ਤਬਦੀਲੀ ਦਾ ਐਲਾਨ ਕੀਤਾ ਹੈ। ਬੈਂਕ ਨੇ ਇੱਕ ਛੋਟੀ ਮਿਆਦ ਦੀ ਦਰ ਘਟਾਈ ਹੈ, ਜਦਕਿ ਜ਼ਿਆਦਾਤਰ ਲੰਬੀ ਮਿਆਦ ਵਾਲੀਆਂ ਦਰਾਂ ਵਿੱਚ ਵਾਧਾ ਕੀਤਾ ਗਿਆ ਹੈ।
ਬੈਂਕ ਵੱਲੋਂ ਛੇ ਮਹੀਨੇ ਦੀ ਫਿਕਸਡ ਹੋਮ ਲੋਨ ਦਰ 0.20 ਫੀਸਦੀ ਘਟਾ ਕੇ 4.49 ਫੀਸਦੀ ਕਰ ਦਿੱਤੀ ਗਈ ਹੈ, ਜੋ ਮਾਰਚ 2022 ਤੋਂ ਬਾਅਦ ਸਭ ਤੋਂ ਘੱਟ ਪੱਧਰ ਹੈ। ਇਸਦੇ ਨਾਲ ਹੀ, ਇੱਕ ਸਾਲ ਦੀ ਫਿਕਸਡ ਸਪੈਸ਼ਲ ਦਰ 4.49 ਫੀਸਦੀ ’ਤੇ ਬਰਕਰਾਰ ਰੱਖੀ ਗਈ ਹੈ।
ਹਾਲਾਂਕਿ, ਲੰਬੀ ਮਿਆਦ ਵਾਲੇ ਕਰਜ਼ਿਆਂ ਲਈ ਗ੍ਰਾਹਕਾਂ ਨੂੰ ਵਧੇਰੇ ਭੁਗਤਾਨ ਕਰਨਾ ਪਵੇਗਾ। ANZ ਨੇ ਦੋ, ਤਿੰਨ, ਚਾਰ ਅਤੇ ਪੰਜ ਸਾਲ ਦੀਆਂ ਫਿਕਸਡ ਦਰਾਂ ਵਿੱਚ ਵਾਧਾ ਕੀਤਾ ਹੈ, ਜਿਸ ਵਿੱਚ ਪੰਜ ਸਾਲ ਵਾਲੀ ਦਰ ਵਿੱਚ ਸਭ ਤੋਂ ਵੱਧ 0.30 ਫੀਸਦੀ ਦਾ ਇਜਾਫਾ ਕੀਤਾ ਗਿਆ ਹੈ।
ਬੈਂਕ ਪ੍ਰਬੰਧਨ ਦਾ ਕਹਿਣਾ ਹੈ ਕਿ ਇਹ ਤਬਦੀਲੀਆਂ ਹੋਲਸੇਲ ਫੰਡਿੰਗ ਦੀਆਂ ਲਾਗਤਾਂ ਵਧਣ ਕਾਰਨ ਲਾਜ਼ਮੀ ਹੋ ਗਈਆਂ ਸਨ। ਉਨ੍ਹਾਂ ਮੁਤਾਬਕ, ਪਿਛਲੇ ਦੋ ਸਾਲਾਂ ਦੌਰਾਨ ਘੱਟ ਸੂਦ ਦਰਾਂ ਕਾਰਨ ਕਈ ਗ੍ਰਾਹਕਾਂ ਨੂੰ ਲਾਭ ਮਿਲਿਆ ਹੈ।
ਇਸ ਦੌਰਾਨ ਹੋਰ ਵੱਡੀਆਂ ਬੈਂਕਾਂ ਵੀ ਇਸੇ ਤਰ੍ਹਾਂ ਦਾ ਰੁਝਾਨ ਅਪਣਾ ਰਹੀਆਂ ਹਨ। BNZ ਸਮੇਤ ਕੁਝ ਬੈਂਕਾਂ ਨੇ ਛੋਟੀ ਮਿਆਦ ਦੀਆਂ ਦਰਾਂ ਘਟਾਈਆਂ ਹਨ ਪਰ ਲੰਬੇ ਸਮੇਂ ਵਾਲੇ ਕਰਜ਼ਿਆਂ ਦੀਆਂ ਦਰਾਂ ਵਿੱਚ ਵਾਧਾ ਕੀਤਾ ਹੈ, ਜਿਸ ਨਾਲ ਘਰ ਖਰੀਦਣ ਵਾਲਿਆਂ ਅਤੇ ਮੌਜੂਦਾ ਕਰਜ਼ੇਦਾਰਾਂ ਲਈ ਫੈਸਲਾ ਕਰਨਾ ਹੋਰ ਮੁਸ਼ਕਲ ਹੋ ਸਕਦਾ ਹੈ।
ਦੇਸ਼ ਦੀ ਸਭ ਤੋਂ ਵੱਡੀ ਬੈਂਕ ਵੱਲੋਂ ਇੱਕ ਸੂਦ ਦਰ ਵਿੱਚ ਕਟੌਤੀ, ਬਾਕੀਆਂ ਵਿੱਚ ਵਾਧਾ
