ਆਕਲੈਂਡ (ਐੱਨ ਜੈੱਡ ਤਸਵੀਰ) ਡਿਸਟ੍ਰਿਕਟ ਕੋਰਟ ਦੀ ਜੱਜ ਐਮਾ ਐਟਕਿਨ ‘ਤੇ ਲੱਗੇ ਦੋਸ਼ਾਂ ਮਾਮਲੇ ਨੇ ਨਿਆਂਕ ਹਲਕਿਆਂ ਵਿੱਚ ਖਾਸ ਚਰਚਾ ਛੇੜ ਦਿੱਤੀ ਹੈ। ਦੋਸ਼ ਹੈ ਕਿ ਜੱਜ ਨੇ ਇੱਕ ਰਾਜਨੀਤਿਕ ਸਮਾਗਮ ਦੌਰਾਨ ਉਪ-ਪ੍ਰਧਾਨ ਮੰਤਰੀ Winston Peters ‘ਤੇ ਚੀਖ ਕੇ “ਤੁਸੀਂ ਝੂਠ ਬੋਲ ਰਹੇ ਹੋ” ਕਿਹਾ। ਇਸ ਮਾਮਲੇ ਦੀ ਸੁਣਵਾਈ ਦੌਰਾਨ ਜੱਜ ਨੂੰ ਨਿਆਂਕ ਆਚਰਨ ਪੈਨਲ ਸਾਹਮਣੇ ਕ੍ਰਾਸ-ਇਕਜ਼ਾਮੀਨੇਸ਼ਨ ਦਾ ਸਾਹਮਣਾ ਕਰਨਾ ਪਿਆ।
ਇਹ ਘਟਨਾ 22 ਨਵੰਬਰ ਨੂੰ ਆਕਲੈਂਡ ਦੇ Northern Club ਵਿੱਚ ਹੋਏ ਨਿਊਜੀਲੈਂਡ ਫਸਟ ਪਾਰਟੀ ਦੇ ਸਮਾਗਮ ਨਾਲ ਜੋੜੀ ਜਾ ਰਹੀ ਹੈ। ਦੱਸਿਆ ਗਿਆ ਹੈ ਕਿ ਸਮਾਗਮ ਦੌਰਾਨ ਜੱਜ ਦੀ ਟਿੱਪਣੀ ਨੇ ਹਾਲ ਵਿੱਚ ਹਲਚਲ ਮਚਾ ਦਿੱਤੀ, ਜਿਸ ਤੋਂ ਬਾਅਦ ਮਾਮਲਾ ਅਧਿਕਾਰਕ ਜਾਂਚ ਤੱਕ ਪਹੁੰਚ ਗਿਆ।
ਸੁਣਵਾਈ ਦੌਰਾਨ ਜੱਜ ਐਟਕਿਨ ਨੇ ਦੋਸ਼ਾਂ ਨੂੰ ਸਖ਼ਤੀ ਨਾਲ ਨਕਾਰਦਿਆਂ ਕਿਹਾ ਕਿ ਉਹ ਨਾ ਤਾਂ ਵਿੰਸਟਨ ਪੀਟਰਜ਼ ਨੂੰ ਪਛਾਣਦੀ ਸੀ ਅਤੇ ਨਾ ਹੀ ਉਸ ਨੂੰ ਇਹ ਜਾਣਕਾਰੀ ਸੀ ਕਿ ਇਹ ਕੋਈ ਰਾਜਨੀਤਿਕ ਸਮਾਗਮ ਹੈ। ਉਸ ਦਾ ਕਹਿਣਾ ਹੈ ਕਿ ਉਸ ਨੇ ਕਿਸੇ ‘ਤੇ ਚੀਖਿਆ ਨਹੀਂ, ਸਗੋਂ ਸਿਰਫ਼ ਇੱਕ ਟਿੱਪਣੀ ਕੀਤੀ, ਜਿਸ ਦੇ ਸ਼ਬਦ ਉਸ ਨੂੰ ਹੁਣ ਪੂਰੀ ਤਰ੍ਹਾਂ ਯਾਦ ਨਹੀਂ।
ਕ੍ਰਾਸ-ਇਕਜ਼ਾਮੀਨੇਸ਼ਨ ਦੌਰਾਨ ਜੱਜ ਤੋਂ ਇਹ ਵੀ ਪੁੱਛਿਆ ਗਿਆ ਕਿ ਕੀ ਉਸ ਨੇ ਸ਼ਰਾਬ ਪੀਤੀ ਸੀ। ਜੱਜ ਨੇ ਕਿਹਾ ਕਿ ਉਸ ਨੇ ਕੇਵਲ ਇੱਕ ਜਾਂ ਦੋ ਗਲਾਸ ਸ਼ੈਂਪੇਨ ਪੀਤੀ ਸੀ ਅਤੇ ਉਹ ਪੂਰੀ ਤਰ੍ਹਾਂ ਹੋਸ਼ ਵਿੱਚ ਸੀ। ਪੈਨਲ ਨੇ ਇਸ ਗੱਲ ‘ਤੇ ਵੀ ਸਵਾਲ ਉਠਾਏ ਕਿ ਇੱਕ ਜੱਜ ਵੱਲੋਂ ਅਜਿਹੀ ਟਿੱਪਣੀ ਨਿਆਂਕ ਮਰਿਆਦਾ ਦੇ ਅਨੁਕੂਲ ਹੈ ਜਾਂ ਨਹੀਂ।
ਇਸ ਮਾਮਲੇ ‘ਚ ਸਾਬਕਾ ਅਟਾਰਨੀ ਜਨਰਲ Judith Collins ਦੇ ਬਿਆਨ ਵੀ ਚਰਚਾ ‘ਚ ਰਹੇ, ਜਿਨ੍ਹਾਂ ‘ਚ ਉਸ ਨੇ ਘਟਨਾ ਨੂੰ “ਚਿੰਤਾਜਨਕ” ਕਰਾਰ ਦਿੱਤਾ ਸੀ। ਹਾਲਾਂਕਿ ਜੱਜ ਐਟਕਿਨ ਨੇ ਕਿਹਾ ਕਿ ਉਸ ਦੇ ਬਿਆਨਾਂ ਨੂੰ ਗਲਤ ਢੰਗ ਨਾਲ ਪੇਸ਼ ਕੀਤਾ ਗਿਆ।
ਨਿਆਂਕ ਆਚਰਨ ਪੈਨਲ ਵੱਲੋਂ ਮਾਮਲੇ ਦੀ ਸੁਣਵਾਈ ਜਾਰੀ ਹੈ। ਪੈਨਲ ਦੇ ਫ਼ੈਸਲੇ ‘ਤੇ ਨਾ ਸਿਰਫ਼ ਜੱਜ ਐਟਕਿਨ ਦਾ ਭਵਿੱਖ, ਸਗੋਂ ਨਿਆਂਕ ਪ੍ਰਣਾਲੀ ਦੀ ਸਾਰਵਜਨਿਕ ਭਰੋਸੇਯੋਗਤਾ ਵੀ ਨਿਰਭਰ ਕਰੇਗੀ।
ਵਿੰਸਟਨ ਪੀਟਰਜ਼ ‘ਤੇ ਚੀਖਣ ਦੇ ਦੋਸ਼: ਡਿਸਟ੍ਰਿਕਟ ਕੋਰਟ ਜੱਜ ਦੀ ਤਿੱਖੀ ਪ੍ਰਤੀਕਿਰਿਆ
