ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੀ ਕੌਮੀ ਸੁਰੱਖਿਆ ਸਥਿਤੀ ਨੂੰ ਦਰਸਾਉਣ ਵਾਲੀ ਸਰਕਾਰੀ ਭਾਸ਼ਾ ਵਿੱਚ ਬਦਲਾਅ ਕੀਤਾ ਗਿਆ ਹੈ। ਹੁਣ ਦੇਸ਼ ਵਿੱਚ ਆਤੰਕੀ ਹਮਲੇ ਦੇ ਖਤਰੇ ਨੂੰ “low” ਦੀ ਥਾਂ “possible” (ਸੰਭਾਵਿਤ) ਕਹਿ ਕੇ ਵਿਆਖਿਆ ਕੀਤਾ ਜਾ ਰਿਹਾ ਹੈ। ਸੁਰੱਖਿਆ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਬਦਲਾਅ ਹਕੀਕਤ ਦੇ ਹੋਰ ਨੇੜੇ ਅਤੇ ਆਮ ਲੋਕਾਂ ਲਈ ਜ਼ਿਆਦਾ ਸਪਸ਼ਟ ਹੈ।
ਸਰਕਾਰੀ ਏਜੰਸੀਜ਼, ਜਿਨ੍ਹਾਂ ਵਿੱਚ New Zealand Security Intelligence Service ਵੀ ਸ਼ਾਮਲ ਹੈ, ਵੱਲੋਂ ਕੀਤੀ ਗਈ ਤਾਜ਼ਾ ਸਮੀਖਿਆ ਅਨੁਸਾਰ ਦੇਸ਼ ਵਿੱਚ ਆਤੰਕੀ ਹਮਲੇ ਦੀ ਸੰਭਾਵਨਾ ਨੂੰ ਪੂਰੀ ਤਰ੍ਹਾਂ ਨਕਾਰਿਆ ਨਹੀਂ ਜਾ ਸਕਦਾ। ਹਾਲਾਂਕਿ ਮੌਜੂਦਾ ਹਾਲਾਤਾਂ ਨੂੰ ਤੁਰੰਤ ਅਤੇ ਗੰਭੀਰ ਖਤਰੇ ਵਾਲਾ ਨਹੀਂ ਮੰਨਿਆ ਗਿਆ।
ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਸਭ ਤੋਂ ਵੱਡਾ ਖਤਰਾ ਇਕੱਲੇ ਵਿਅਕਤੀਆਂ ਵੱਲੋਂ ਹੋ ਸਕਦਾ ਹੈ, ਜੋ ਆਨਲਾਈਨ ਕਟੜਪੰਥੀ ਵਿਚਾਰਧਾਰਾਵਾਂ ਤੋਂ ਪ੍ਰਭਾਵਿਤ ਹੋ ਕੇ ਚਾਕੂ ਜਾਂ ਵਾਹਨ ਵਰਗੇ ਆਮ ਸਾਧਨਾਂ ਨਾਲ ਹਮਲਾ ਕਰ ਸਕਦੇ ਹਨ। ਇਸ ਤਰ੍ਹਾਂ ਦੇ ਹਮਲੇ ਅਕਸਰ ਬਿਨਾਂ ਕਿਸੇ ਵੱਡੀ ਯੋਜਨਾ ਦੇ ਅਚਾਨਕ ਕੀਤੇ ਜਾਂਦੇ ਹਨ।
ਸੁਰੱਖਿਆ ਅਧਿਕਾਰੀਆਂ ਨੇ ਸਪਸ਼ਟ ਕੀਤਾ ਹੈ ਕਿ ਚੇਤਾਵਨੀ ਪੱਧਰ ਬਦਲਣ ਦਾ ਮਤਲਬ ਲੋਕਾਂ ਵਿੱਚ ਡਰ ਪੈਦਾ ਕਰਨਾ ਨਹੀਂ, ਸਗੋਂ ਖਤਰੇ ਦੀ ਸਥਿਤੀ ਨੂੰ ਸਹੀ ਅਤੇ ਸਪਸ਼ਟ ਤਰੀਕੇ ਨਾਲ ਦਰਸਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਹਾਲਾਤਾਂ ਦੇ ਅਨੁਸਾਰ ਇਹ ਪੱਧਰ ਅੱਗੇ ਵੀ ਘਟ ਜਾਂ ਵੱਧ ਸਕਦਾ ਹੈ।
ਸਰਕਾਰ ਨੇ ਆਮ ਲੋਕਾਂ ਨੂੰ ਸਚੇਤ ਰਹਿਣ, ਸ਼ੱਕੀ ਗਤੀਵਿਧੀਆਂ ਦੀ ਸੂਚਨਾ ਦੇਣ ਅਤੇ ਸੁਰੱਖਿਆ ਏਜੰਸੀਜ਼ ਨਾਲ ਸਹਿਯੋਗ ਕਰਨ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਕਿਸੇ ਵੀ ਸੰਭਾਵਿਤ ਖਤਰੇ ਨੂੰ ਸਮੇਂ ਰਹਿੰਦੇ ਟਾਲਿਆ ਜਾ ਸਕੇ।
ਨਿਊਜ਼ੀਲੈਂਡ ਵਿੱਚ ਆਤੰਕੀ ਹਮਲਾ ‘ਸੰਭਾਵਿਤ’, ਸੁਰੱਖਿਆ ਚੇਤਾਵਨੀ ਦੀ ਭਾਸ਼ਾ ਵਿੱਚ ਬਦਲਾਅ
