ਕੈਂਟਰਬਰੀ ਕੈਂਪਗ੍ਰਾਊਂਡ ‘ਚ ਪਾਣੀ ਪੀਣ ਤੋਂ ਬਾਅਦ ਛੇ ਲੋਕ ਹਸਪਤਾਲ ਵਿੱਚ ਦਾਖ਼ਲ

ਆਕਲੈਂਡ (ਐੱਨ ਜੈੱਡ ਤਸਵੀਰ) ਉੱਤਰੀ ਕੈਂਟਰਬਰੀ ਦੇ ਇੱਕ ਕੈਂਪਗ੍ਰਾਊਂਡ ‘ਚ ਨਿੱਜੀ ਪੀਣ ਵਾਲੇ ਪਾਣੀ ਦੀ ਸਪਲਾਈ ਪ੍ਰਦੂਸ਼ਿਤ ਹੋਣ ਕਾਰਨ ਛੇ ਲੋਕ ਹਸਪਤਾਲ ਵਿੱਚ ਦਾਖ਼ਲ ਕਰਵਾਏ ਗਏ ਹਨ ਅਤੇ ਘੱਟੋ-ਘੱਟ ਹੋਰ 10 ਲੋਕ ਬੀਮਾਰ ਹੋਏ ਹਨ।
ਤਾਉਮਾਤਾ ਅਰੋਵਾਈ ਨੇ ਕਿਹਾ ਕਿ ਉਸਨੂੰ ਹੈਲਥ ਨਿਊਜ਼ੀਲੈਂਡ ਦੀ ਨੈਸ਼ਨਲ ਪਬਲਿਕ ਹੈਲਥ ਸਰਵਿਸ ਵੱਲੋਂ ਸਤੰਬਰ ਵਿੱਚ ਹਨਮਰ ਸਪ੍ਰਿੰਗਜ਼ ਫਾਰੇਸਟ ਕੈਂਪ ਦੀ ਯਾਤਰਾ ਕਰਨ ਵਾਲੇ ਲੋਕਾਂ, ਜਿਸ ਵਿੱਚ ਸਕੂਲੀ ਗਰੁੱਪ ਵੀ ਸ਼ਾਮਲ ਸਨ ,ਵਿੱਚ ਗੈਸਟ੍ਰੋਇੰਟੈਸਟਾਈਨਲ ਬੀਮਾਰੀ ਦੇ ਮਾਮਲਿਆਂ ਬਾਰੇ ਸੁਚੇਤ ਕੀਤਾ ਗਿਆ ਸੀ।
ਤਾਉਮਾਤਾ ਅਰੋਵਾਈ ਦੇ ਆਪਰੇਸ਼ਨ ਪ੍ਰਮੁੱਖ ਸਟੀਵ ਟੇਲਰ ਨੇ ਕਿਹਾ ਕਿ ਇਸ ਬੀਮਾਰੀ ਨਾਲ ਜੁੜੇ 10 ਪੁਸ਼ਟੀਕ੍ਰਿਤ ਅਤੇ 37 ਸੰਭਾਵਿਤ ਕੇਸ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿੱਚੋਂ ਛੇ ਲੋਕ ਹਸਪਤਾਲ ਵਿੱਚ ਦਾਖ਼ਲ ਕੀਤੇ ਗਏ ਹਨ।
ਇਹ ਬੀਮਾਰੀ “ਸ਼ੀਗਾ ਟਾਕਸਿਨ-ਉਤਪਾਦਕ ਈ.ਕੋਲੀ” ਕਾਰਨ ਹੋਈ ਹੈ, ਜੋ ਛੋਟੇ ਬੱਚਿਆਂ, ਬਜ਼ੁਰਗਾਂ ਅਤੇ ਕਮਜ਼ੋਰ ਰੋਗ-ਰੋਕੂ ਪ੍ਰਣਾਲੀ ਵਾਲੇ ਲੋਕਾਂ ਲਈ ਖ਼ਤਰਨਾਕ ਹੋ ਸਕਦੀ ਹੈ।
ਇਹ ਬੀਮਾਰੀ ਦੇ ਲੱਛਣਾਂ ਵਿੱਚ ਤੇਜ਼ ਪੇਟ ਦਰਦ, ਖੂਨੀ ਦਸਤ, ਉਲਟੀ ਅਤੇ ਬੁਖ਼ਾਰ ਸ਼ਾਮਲ ਹਨ। ਟੇਲਰ ਨੇ ਕਿਹਾ, “ਇਹ ਇੱਕ ਗੰਭੀਰ ਬੀਮਾਰੀ ਹੈ ਅਤੇ ਅਸੀਂ ਜਾਣਦੇ ਹਾਂ ਕਿ ਇਸ ਨੇ ਬੀਮਾਰ ਹੋਏ ਲੋਕਾਂ ਅਤੇ ਸਿਹਤਮੰਦ ਹੋ ਰਹੇ ਲੋਕਾਂ ‘ਤੇ ਵੱਡਾ ਅਸਰ ਕੀਤਾ ਹੈ।”
“17 ਸਤੰਬਰ ਨੂੰ ਕੈਂਪਗ੍ਰਾਊਂਡ ਲਈ ਉਬਾਲਿਆ ਪਾਣੀ ਪੀਣ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਸੀ। ਇਸ ਤੋਂ ਬਾਅਦ, ਅਥਾਰਟੀ ਦੇ ਕਰਮਚਾਰੀਆਂ ਨੇ ਸਾਈਟ ਦਾ ਦੌਰਾ ਕੀਤਾ ਤਾਂ ਜੋ ਕੈਂਪਗ੍ਰਾਊਂਡ ਦੀ ਪਾਣੀ ਸਪਲਾਈ ਦੀ ਜਾਂਚ ਕੀਤੀ ਜਾ ਸਕੇ ਅਤੇ ਇਹ ਪੱਕਾ ਕੀਤਾ ਜਾ ਸਕੇ ਕਿ ਉਪਭੋਗਤਾਵਾਂ ਲਈ ਚੇਤਾਵਨੀਆਂ ਅਤੇ ਸੁਰੱਖਿਆ ਕਦਮ ਲਾਗੂ ਹਨ।”
“ਹੁਣ ਜਦੋਂ ਇਹ ਪੁਸ਼ਟੀ ਹੋ ਗਈ ਹੈ ਕਿ ਪੀਣ ਵਾਲਾ ਪਾਣੀ ਬੀਮਾਰੀ ਦਾ ਸੰਭਾਵਿਤ ਸਰੋਤ ਹੈ, ਅਥਾਰਟੀ ਨੇ ਹਦਾਇਤ ਦਿੱਤੀ ਹੈ ਕਿ ਇਹ ਚੇਤਾਵਨੀ ਉਸ ਵੇਲੇ ਤਕ ਬਰਕਰਾਰ ਰਹੇਗੀ ਜਦ ਤਕ ਪ੍ਰਭਾਵਸ਼ਾਲੀ ਪਾਣੀ ਸਫਾਈ ਪ੍ਰਣਾਲੀ ਲਾਗੂ ਨਹੀਂ ਹੁੰਦੀ।”
ਟੇਲਰ ਨੇ ਕਿਹਾ ਕਿ ਕੈਂਪਗ੍ਰਾਊਂਡ ‘ਚ ਜਾਣ ਵਾਲੇ ਸੈਲਾਨੀਆਂ ਲਈ ਇਹ ਜਾਣਣਾ ਬਹੁਤ ਜ਼ਰੂਰੀ ਹੈ ਕਿ ਪੀਣ ਵਾਲੇ ਪਾਣੀ ਨਾਲ ਕੀ ਜੋਖਮ ਹਨ ਅਤੇ ਉਨ੍ਹਾਂ ਨੂੰ ਪਾਣੀ ਉਬਾਲ ਕੇ ਪੀਣ ਦੀਆਂ ਹਦਾਇਤਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ।
“ਕੈਂਪਗ੍ਰਾਊਂਡ ਆਪਰੇਟਰ ਪੂਰੀ ਤਰ੍ਹਾਂ ਸਹਿਯੋਗ ਕਰ ਰਿਹਾ ਹੈ ਅਤੇ ਸਾਈਟ ਤੇ ਮੌਜੂਦ ਗਰੁੱਪਾਂ ਨਾਲ ਸਰਗਰਮ ਸੰਚਾਰ ਕਰ ਰਿਹਾ ਹੈ। ਉਸ ਨੇ ਕਿਹਾ ਮਹਿਮਾਨਾਂ ਨੂੰ ਬੋਤਲਬੰਦ ਪਾਣੀ ਦਿੱਤਾ ਗਿਆ ਹੈ ਅਤੇ ਹਰ ਟੈਪ ‘ਤੇ ਚੇਤਾਵਨੀ ਲਗਾਈ ਗਈ ਹੈ ਕਿ ਪਾਣੀ ਉਬਾਲ ਕੇ ਹੀ ਪੀਓ,” ।
“ਅਸੀਂ ਸਾਰੇ ਸਪਲਾਇਰਾਂ ਨੂੰ ਪ੍ਰੇਰਿਤ ਕਰਦੇ ਹਾਂ ਕਿ ਉਹ ਸਮਝਣ ਕਿ ਉਹ ਪੀਣ ਵਾਲੇ ਪਾਣੀ ਨੂੰ ਕਿਵੇਂ ਸੁਰੱਖਿਅਤ ਰੱਖ ਰਹੇ ਹਨ, ਖਾਸਕਰ ਉਹ ਜੋ ਗਰਮੀ ਦੇ ਮਹੀਨਿਆਂ ‘ਚ ਵੱਧ ਲੋਕਾਂ ਨੂੰ ਪਾਣੀ ਪ੍ਰਦਾਨ ਕਰਦੇ ਹਨ।”