ਪੁਲਿਸ ਵੱਲੋਂ ਗੋਲੀ ਮਾਰੇ ਗੈਂਗ ਮੈਂਬਰ ਦੀ ਅਦਾਲਤ ਵਿੱਚ ਪੇਸ਼ੀ, ਗੰਭੀਰ ਦੋਸ਼ਾਂ ਦਾ ਸਾਹਮਣਾ

ਹੈਮਿਲਟਨ (ਐੱਨ ਜੈੱਡ ਤਸਵੀਰ) 40 ਸਾਲਾ ਗੈਂਗ ਮੈਂਬਰ ਹੋਨੇ ਹੌਨੂਈ ਨੀਅਲ, ਜਿਸ ਨੂੰ ਹਾਲ ਹੀ ਵਿੱਚ ਪੁਲਿਸ ਨੇ ਗੋਲੀ ਮਾਰੀ ਸੀ, ਸੋਮਵਾਰ ਨੂੰ ਹੈਮਿਲਟਨ ਡਿਸਟ੍ਰਿਕਟ ਕੋਰਟ ਵਿੱਚ ਆਪਣੇ ਸਾਥੀ ਹੋਪ ਵਾਇਮਾਟਾ ਵੈਟੇਰੇ ਨਾਲ ਪੇਸ਼ ਹੋਇਆ।
ਅਦਾਲਤ ਵਿੱਚ ਦੋਹਾਂ ਉੱਤੇ ਬੰਧਕ ਬਣਾਉਣ, ਗੰਭੀਰ ਸਰੀਰਕ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਅਤੇ ਜਬਰਦਸਤੀ ਘਰ ਵਿੱਚ ਦਾਖ਼ਲ ਹੋਣ ਵਰਗੇ ਗੰਭੀਰ ਦੋਸ਼ ਲਗਾਏ ਗਏ ਹਨ। ਇਹ ਮਾਮਲਾ 29 ਜਨਵਰੀ ਨੂੰ ਹੈਮਿਲਟਨ ਵਿੱਚ ਹੋਈ ਹਿੰਸਕ ਘਟਨਾ ਨਾਲ ਜੁੜਿਆ ਦੱਸਿਆ ਜਾ ਰਿਹਾ ਹੈ, ਜਿੱਥੇ ਇੱਕ ਘਰ ਵਿੱਚ ਦਾਖ਼ਲ ਹੋ ਕੇ ਲੋਕਾਂ ਨਾਲ ਮਾਰਕੁੱਟ ਕੀਤੀ ਗਈ।
ਪੁਲਿਸ ਮੁਤਾਬਕ, ਬਾਅਦ ਵਿੱਚ ਨੀਅਲ ਨੂੰ ਇੱਕ ਕਾਰਪਾਰਕ ਵਿੱਚ ਲੱਭਿਆ ਗਿਆ। ਜਦੋਂ ਪੁਲਿਸ ਅਧਿਕਾਰੀ ਉਸ ਦੇ ਨੇੜੇ ਗਏ ਤਾਂ ਉਸ ਨੇ ਹਥਿਆਰ ਦਿਖਾਇਆ, ਜਿਸ ਕਾਰਨ ਆਪਣੀ ਸੁਰੱਖਿਆ ਲਈ ਪੁਲਿਸ ਨੇ ਗੋਲੀ ਚਲਾਈ। ਨੀਅਲ ਨੂੰ ਹਲਕੀ ਸੱਟਾਂ ਆਈਆਂ ਅਤੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ।
ਅਦਾਲਤ ਵਿੱਚ ਨੀਅਲ ਨੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕਰਦਿਆਂ “ਨੌਟ ਗਿਲਟੀ” ਦੀ ਦਲੀਲ ਦਿੱਤੀ। ਉਸ ਨੇ ਬੇਲ ਦੀ ਮੰਗ ਨਹੀਂ ਕੀਤੀ ਅਤੇ ਉਸ ਨੂੰ ਹਿਰਾਸਤ ਵਿੱਚ ਹੀ ਰੱਖਿਆ ਗਿਆ ਹੈ। ਉਸ ਦੇ ਮਾਮਲੇ ਦੀ ਅਗਲੀ ਸੁਣਵਾਈ ਅਪ੍ਰੈਲ ਵਿੱਚ ਹੋਵੇਗੀ। ਦੂਜੇ ਪਾਸੇ, ਵੈਟੇਰੇ ਦੀ ਬੇਲ ਸੁਣਵਾਈ ਅਗਲੇ ਹਫ਼ਤੇ ਨਿਰਧਾਰਤ ਕੀਤੀ ਗਈ ਹੈ।
ਪੁਲਿਸ ਵੱਲੋਂ ਗੋਲੀ ਚਲਾਉਣ ਦੀ ਘਟਨਾ ਨੂੰ ਸਵਤੰਤਰ ਜਾਂਚ ਏਜੰਸੀ ਕੋਲ ਭੇਜ ਦਿੱਤਾ ਗਿਆ ਹੈ।