ਔਰਤ ਕਾਨੂੰਨੀ ਹੱਦ ਤੋਂ ਚਾਰ ਗੁਣਾ ਜ਼ਿਆਦਾ ਸ਼ਰਾਬ ਦੇ ਪ੍ਰਭਾਵ ਹੇਠ ਫੜੀ ਗਈ

ਆਕਲੈਂਡ: (ਐੱਨ ਜੈੱਡ ਤਸਵੀਰ) ਸਾਊਥਲੈਂਡ ਦੇ ਗੋਰ ਸ਼ਹਿਰ ਵਿੱਚ ਹੈਨਜ਼ ਪਾਰਟੀ ਤੋਂ ਬਾਅਦ ਨਸ਼ੇ ਦੀ ਹਾਲਤ ਵਿੱਚ ਵਾਹਨ ਚਲਾਉਣ ਦਾ ਇੱਕ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਇੱਕ 38 ਸਾਲਾ ਔਰਤ ਨੂੰ ਉਸ ਵੇਲੇ ਰੋਕਿਆ ਜਦੋਂ ਉਹ ਕਾਨੂੰਨੀ ਤੌਰ ‘ਤੇ ਮਨਜ਼ੂਰ ਸ਼ਰਾਬ ਦੀ ਹੱਦ ਤੋਂ ਲਗਭਗ ਚਾਰ ਗੁਣਾ ਜ਼ਿਆਦਾ ਨਸ਼ੇ ਵਿੱਚ ਗੱਡੀ ਚਲਾ ਰਹੀ ਸੀ।
ਪੁਲਿਸ ਮੁਤਾਬਕ ਇਹ ਘਟਨਾ ਐਤਵਾਰ ਸਵੇਰੇ ਕਰੀਬ 7:30 ਵਜੇ ਮੈਨ ਸਟਰੀਟ ‘ਤੇ ਵਾਪਰੀ, ਜਦੋਂ ਇੱਕ ਸਚੇਤ ਨਾਗਰਿਕ ਨੇ ਸੂਚਨਾ ਦਿੱਤੀ ਕਿ ਇੱਕ ਕਾਰ ਸੜਕ ਦੀ ਸੈਂਟਰ ਲਾਈਨ ਨੂੰ ਵਾਰ-ਵਾਰ ਲੰਘ ਰਹੀ ਹੈ। ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਵਾਹਨ ਨੂੰ ਰੋਕਿਆ।
ਜਾਂਚ ਦੌਰਾਨ ਪੁਲਿਸ ਨੇ ਔਰਤ ਤੋਂ ਸ਼ਰਾਬ ਦੀ ਤੀਬਰ ਗੰਧ, ਅੱਖਾਂ ਵਿੱਚ ਲਾਲੀ ਅਤੇ ਅਸਪਸ਼ਟ ਬੋਲ ਦੇ ਲੱਛਣ ਨੋਟ ਕੀਤੇ। ਬ੍ਰੈਥ ਟੈਸਟ ਵਿੱਚ ਪੁਸ਼ਟੀ ਹੋਈ ਕਿ ਉਹ ਭਾਰੀ ਨਸ਼ੇ ਦੀ ਹਾਲਤ ਵਿੱਚ ਸੀ, ਜਿਸ ਤੋਂ ਬਾਅਦ ਉਸ ਨੂੰ ਮੌਕੇ ‘ਤੇ ਹੀ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਪੁਲਿਸ ਨੇ ਦੱਸਿਆ ਕਿ ਔਰਤ ਦਾ 28 ਦਿਨਾਂ ਲਈ ਡਰਾਈਵਿੰਗ ਲਾਇਸੈਂਸ ਨਿਲੰਬਿਤ ਕਰ ਦਿੱਤਾ ਗਿਆ ਹੈ ਅਤੇ ਮਾਮਲਾ ਹੁਣ ਅਦਾਲਤ ‘ਚ ਜਾਵੇਗਾ। ਉਹ 21 ਜਨਵਰੀ 2026 ਨੂੰ ਗੋਰ ਡਿਸਟ੍ਰਿਕਟ ਕੋਰਟ ਵਿੱਚ ਪੇਸ਼ ਹੋਵੇਗੀ।
ਇਸ ਮੌਕੇ ਪੁਲਿਸ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀ ਬੇਪਰਵਾਹ ਡਰਾਈਵਿੰਗ ਜਾਨਲੇਵਾ ਸਾਬਤ ਹੋ ਸਕਦੀ ਹੈ। ਉਨ੍ਹਾਂ ਲੋਕਾਂ ਨੰਕ ਅਪੀਲ ਕੀਤੀ ਕਿ ਸਮਾਜਿਕ ਸਮਾਗਮਾਂ ਤੋਂ ਬਾਅਦ ਹਮੇਸ਼ਾਂ ਸੋਬਰ ਡਰਾਈਵਰ, ਟੈਕਸੀ ਜਾਂ ਰਾਈਡਸ਼ੇਅਰ ਸੇਵਾਵਾਂ ਦੀ ਵਰਤੋਂ ਕਰਨ।
ਪੁਲਿਸ ਅਨੁਸਾਰ, ਜ਼ਿੰਮੇਵਾਰ ਡਰਾਈਵਿੰਗ ਹੀ ਸੜਕਾਂ ‘ਤੇ ਆਪਣੀ ਅਤੇ ਦੂਜਿਆਂ ਦੀ ਜਾਨ ਬਚਾਉਣ ਦਾ ਇਕੋ ਰਾਹ ਹੈ।