ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੇ ਖਤਰਨਾਕ ਸੀਰੀਅਲ ਯੌਨ ਅਪਰਾਧੀ ਮਾਲਕਮ ਰੇਵਾ ਨੇ ਅਦਾਲਤ ਵਿੱਚ ਇੱਕ ਹੋਰ ਮਹਿਲਾ ਨਾਲ ਯੌਨ ਹਮਲਾ ਕਰਨ ਦੀ ਕਬੂਲੀਅਤ ਕਰ ਲਈ ਹੈ। ਇਹ ਮਾਮਲਾ ਲਗਭਗ ਚਾਰ ਦਹਾਕੇ ਪੁਰਾਣੀ ਘਟਨਾ ਨਾਲ ਜੁੜਿਆ ਹੋਇਆ ਹੈ, ਜਿਸ ਨਾਲ ਦੇਸ਼ ਦੇ ਨਿਆਂ ਪ੍ਰਣਾਲੀ ਵਿੱਚ ਇੱਕ ਵਾਰ ਫਿਰ ਪੁਰਾਣੇ ਅਪਰਾਧਾਂ ਦੀ ਗੰਭੀਰਤਾ ਉਜਾਗਰ ਹੋਈ ਹੈ।
72 ਸਾਲਾ ਮਾਲਕਮ ਰੇਵਾ ਨੇ ਆਕਲੈਂਡ ਹਾਈ ਕੋਰਟ ਵਿੱਚ ਵੀਡੀਓ ਲਿੰਕ ਰਾਹੀਂ ਪੇਸ਼ ਹੋ ਕੇ 18 ਜੂਨ 1988 ਨੂੰ ਇੱਕ ਮਹਿਲਾ ‘ਤੇ ਕੀਤੇ ਗਏ ਯੌਨ ਹਮਲੇ ਦੇ ਦੋਸ਼ ਨੂੰ ਮੰਨ ਲਿਆ। ਅਦਾਲਤ ਨੂੰ ਦੱਸਿਆ ਗਿਆ ਕਿ ਦੋਸ਼ੀ ਨੇ ਆਪਣੀ ਪਹਿਚਾਣ ਲੁਕਾਉਣ ਜਾਂ ਨਾਮ ਪ੍ਰਕਾਸ਼ਨ ‘ਤੇ ਪਾਬੰਦੀ ਦੀ ਕੋਈ ਮੰਗ ਨਹੀਂ ਕੀਤੀ।
ਇਸ ਮਾਮਲੇ ਵਿੱਚ ਸਜ਼ਾ 17 ਅਪਰੈਲ 2026 ਨੂੰ ਸੁਣਾਈ ਜਾਣੀ ਹੈ। ਹਾਲਾਂਕਿ ਰੇਵਾ ਪਹਿਲਾਂ ਹੀ ਜ਼ਿੰਦਗੀ ਭਰ ਦੀ ਕੈਦ ਕੱਟ ਰਿਹਾ ਹੈ ਅਤੇ ਇਸ ਨਵੇਂ ਦੋਸ਼ ਨਾਲ ਉਸ ਦੀ ਸਜ਼ਾ ਦੀ ਮਿਆਦ ‘ਤੇ ਕੋਈ ਤੁਰੰਤ ਅਸਰ ਪੈਣ ਦੀ ਸੰਭਾਵਨਾ ਨਹੀਂ ਹੈ।
ਜ਼ਿਕਰਯੋਗ ਹੈ ਕਿ ਮਾਲਕਮ ਰੇਵਾ ਪਹਿਲਾਂ ਹੀ 25 ਤੋਂ ਵੱਧ ਮਹਿਲਾਵਾਂ ਨਾਲ ਯੌਨ ਅਪਰਾਧ ਕਰਨ ਦਾ ਦੋਸ਼ੀ ਸਾਬਤ ਹੋ ਚੁੱਕਾ ਹੈ। ਉਸ ਨੂੰ 2019 ਵਿੱਚ ਪਾਪਾਟੋਏ ਵਾਸੀ ਸੁਜ਼ਨ ਬਰਡੇਟ ਨਾਲ ਯੌਨ ਹਮਲੇ ਅਤੇ ਹੱਤਿਆ ਦੇ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੰਦਿਆਂ ਰੋਕਥਾਮੀ ਹਿਰਾਸਤ (preventive detention) ਦੀ ਸਜ਼ਾ ਸੁਣਾਈ ਗਈ ਸੀ।
ਪੁਲਿਸ ਅਨੁਸਾਰ, ਇਹ ਨਵਾਂ ਮਾਮਲਾ 1980 ਦੇ ਦਹਾਕੇ ਦੌਰਾਨ ਓਨਹੁੰਗਾ ਖੇਤਰ ਵਿੱਚ ਵਾਪਰਿਆ ਸੀ, ਪਰ ਉਸ ਸਮੇਂ ਹਮਲਾਵਰ ਦੀ ਪਛਾਣ ਨਹੀਂ ਹੋ ਸਕੀ। ਕਈ ਸਾਲਾਂ ਬਾਅਦ ਪੀੜਿਤ ਮਹਿਲਾ ਵੱਲੋਂ ਮੁੜ ਪੁਲਿਸ ਨਾਲ ਸੰਪਰਕ ਕਰਨ ਉਪਰੰਤ ਕੇਸ ਨੂੰ ਦੁਬਾਰਾ ਖੋਲ੍ਹਿਆ ਗਿਆ, ਜਿਸ ਤੋਂ ਬਾਅਦ ਜਾਂਚ ਅੱਗੇ ਵਧੀ ਅਤੇ ਦੋਸ਼ੀ ਤੱਕ ਪਹੁੰਚ ਸੰਭਵ ਹੋ ਸਕੀ।
ਮਾਲਕਮ ਰੇਵਾ ਵੱਲੋਂ ਪਹਿਲਾਂ ਕੀਤੀਆਂ ਗਈਆਂ ਕਾਨੂੰਨੀ ਅਪੀਲਾਂ ਅਤੇ ਮੁਕੱਦਮੇ ਦੀ ਪੁਨਰ ਜਾਂਚ ਲਈ ਅਰਜ਼ੀਆਂ ਸਭ ਅਦਾਲਤਾਂ ਵੱਲੋਂ ਖ਼ਾਰਜ ਕੀਤੀਆਂ ਜਾ ਚੁੱਕੀਆਂ ਹਨ। ਅਦਾਲਤਾਂ ਨੇ ਸਾਫ਼ ਕੀਤਾ ਹੈ ਕਿ ਉਸ ਖ਼ਿਲਾਫ਼ ਪੇਸ਼ ਕੀਤੇ ਗਏ ਸਬੂਤ ਮਜ਼ਬੂਤ ਅਤੇ ਭਰੋਸੇਯੋਗ ਹਨ।
ਨਿਆਂਕ ਮਾਹਿਰਾਂ ਦੇ ਮਤਾਬਕ, ਇਸ ਤਾਜ਼ਾ ਕਬੂਲੀਅਤ ਨਾਲ ਇੱਕ ਵਾਰ ਫਿਰ ਇਹ ਸਾਬਤ ਹੁੰਦਾ ਹੈ ਕਿ ਭਾਵੇਂ ਅਪਰਾਧ ਕਿੰਨਾ ਵੀ ਪੁਰਾਣਾ ਕਿਉਂ ਨਾ ਹੋਵੇ, ਪੀੜਤਾਂ ਨੂੰ ਨਿਆਂ ਮਿਲਣ ਦੀ ਪ੍ਰਕਿਰਿਆ ਕਦੇ ਵੀ ਬੇਮਾਇਨੇ ਨਹੀਂ ਹੋਂਦੀ।
ਸੀਰੀਅਲ ਯੌਨ ਅਪਰਾਧੀ ਨੇ ਇੱਕ ਹੋਰ ਮਹਿਲਾ ਨਾਲ ਯੌਨ ਹਮਲੇ ਦੀ ਕਬੂਲੀਅਤ ਕੀਤੀ
