ਆਕਲੈਂਡ (ਐੱਨ ਜੈੱਡ ਤਸਵੀਰ) ਰੋਟੋਰੂਆ ਵਿੱਚ ਇਕ ਨਵੀਂ ਕਿਫਾਇਤੀ ਰਿਹਾਇਸ਼ ਯੋਜਨਾ ਲਈ ਇਸ ਸਮੇਂ 50 ਤੋਂ ਵੱਧ ਵਹਾਨੌ ਉਡੀਕ ਸੂਚੀ ‘ਚ ਦਰਜ ਹਨ। ਇਹ ਯੋਜਨਾ ਸਰਕਾਰ ਅਤੇ ਆਈਵੀ ਨਗਾਤੀ ਵਹਾਕੌ ਦੀ ਸਾਂਝੀ ਭਾਈਵਾਲੀ ਤਹਿਤ ਚੱਲ ਰਹੀ ਹੈ, ਜੋ 2027 ਦੇ ਮੱਧ ਤੱਕ 80 ਨਵੇਂ ਕਿਰਾਏ ਦੇ ਘਰ ਮੁਹੱਈਆ ਕਰਵਾਏਗੀ। ਇਸ ਦੂਜੇ ਪੜਾਅ ਲਈ ਸਰਕਾਰ ਵੱਲੋਂ ਮਨਾਵਾ ਗਾਰਡਨਜ਼ ਹਾਊਸਿੰਗ ਪ੍ਰੋਜੈਕਟ ਲਈ $28.47 ਮਿਲੀਅਨ ਨਿਰਧਾਰਤ ਕੀਤੇ ਗਏ ਹਨ, ਜਦਕਿ ਕਬੀਲੇ ਨੇ ਆਪਣੇ ਪਾਸੋਂ $16 ਮਿਲੀਅਨ ਦਾ ਨਿਵੇਸ਼ ਕੀਤਾ ਹੈ।
ਇਹ ਘਰ 2024 ਵਿੱਚ ਪੂਰੇ ਹੋਏ ਪਹਿਲੇ ਪੜਾਅ ਦੇ 80 ਕਿਰਾਏ ਦੇ ਘਰਾਂ ਤੋਂ ਇਲਾਵਾ ਹੋਣਗੇ। ਐਸੋਸੀਏਟ ਹਾਊਸਿੰਗ ਮੰਤਰੀ ਤਾਮਾ ਪੋਟਾਕਾ ਨੇ ਕਿਹਾ ਕਿ ਨਵੇਂ ਘਰਾਂ ਨਾਲ ਵਹਾਨੌ ਨੂੰ ਆਧੁਨਿਕ ਅਤੇ ਕਿਫਾਇਤੀ ਰਿਹਾਇਸ਼ ਮਿਲੇਗੀ।
ਉਨ੍ਹਾਂ ਕਿਹਾ, “ਸਾਡਾ ਧਿਆਨ ਸਹੀ ਲੋਕਾਂ ਲਈ ਸਹੀ ਸਹਾਇਤਾ ਨਾਲ ਸਹੀ ਥਾਂ ‘ਤੇ ਘਰ ਪ੍ਰਦਾਨ ਕਰਨ ‘ਤੇ ਹੈ। ਇਹ ਘਰ ਖ਼ਾਸ ਕਰਕੇ ਕੌਮਾਟੁਆ, ਨਿੱਜੀ ਕਿਰਾਏ ਦੇ ਬਾਜ਼ਾਰ ਵਿੱਚ ਕੀਮਤਾਂ ਦਾ ਸਾਹਮਣਾ ਨਾ ਕਰ ਸਕਣ ਵਾਲੇ ਪਰਿਵਾਰਾਂ ਅਤੇ ਲੰਬੀ ਮਿਆਦ ਦੀ ਰਿਹਾਇਸ਼ ਚਾਹੁਣ ਵਾਲਿਆਂ ਲਈ ਲਾਭਦਾਇਕ ਹੋਣਗੇ।”
ਮੰਤਰੀ ਅਨੁਸਾਰ, ਇਹ ਨਿਵੇਸ਼ ਰੋਟੋਰੂਆ ਦੇ ਮਾਓਰੀ ਵਹਾਨੌ ਲਈ ਮਹੱਤਵਪੂਰਨ ਹੈ, ਕਿਉਂਕਿ ਪਿਛਲੇ ਸਮੇਂ ਰਿਹਾਇਸ਼ ਦੀ ਘਾਟ ਕਾਰਨ ਕਈ ਪਰਿਵਾਰ ਮੋਟਲਾਂ ਜਾਂ ਅਣਉਚਿਤ ਥਾਵਾਂ ‘ਤੇ ਰਹਿਣ ਲਈ ਮਜਬੂਰ ਸਨ। ਉਨ੍ਹਾਂ ਕਿਹਾ ਕਿ ਮਾਓਰੀ ਸੰਗਠਨਾਂ ਅਤੇ ਕਮਿਊਨਿਟੀ ਗਰੁੱਪਾਂ ਨਾਲ ਸਹਿਯੋਗ ਰਾਹੀਂ ਇਹ ਹਾਲਾਤ ਬਦਲੇ ਜਾ ਰਹੇ ਹਨ।
ਨਗਾਤੀ ਵਹਾਕੌ ਵੱਲੋਂ ਨਵੰਬਰ ਵਿੱਚ ਪਹਿਲੇ ਪੜਾਅ ਦੇ ਤਹਿਤ 80 ਘਰ ਬਣਾਏ ਗਏ ਸਨ, ਪਰ ਆਈਵੀ ਦੇ ਮੁਤਾਬਕ ਨਵੇਂ ਘਰਾਂ ਦੀ ਲੋੜ ਅਜੇ ਵੀ ਵਧੀਕ ਹੈ, ਜਿਸ ਕਰਕੇ 50 ਤੋਂ ਵੱਧ ਵਹਾਨੌ ਉਡੀਕ ‘ਚ ਹਨ।
ਰੋਟੋਰੂਆ ‘ਚ ਗੰਭੀਰ ਹੋਇਆ ਘਰਾਂ ਦਾ ਸੰਕਟ
