ਆਕਲੈਂਡ, (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਪੁਲਿਸ ਵਿਭਾਗ ਨੂੰ ਲੈ ਕੇ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਰਾਜੀ ਰੇਡੀਓ ਨਿਊਜ਼ੀਲੈਂਡ ਦੀ ਤਾਜਾ ਰਿਪੋਰਟ ਮੁਤਾਬਕ, 30 ਹਜ਼ਾਰ ਤੋਂ ਵੱਧ ਸ਼ਰਾਬ-ਸਾਹ ਟੈਸਟਾਂ ਨੂੰ ਝੂਠਾ ਜਾਂ ਗਲਤ ਤਰੀਕੇ ਨਾਲ ਦਰਜ ਕਰਨ ਦੇ ਦੋਸ਼ਾਂ ਹੇਠ 100 ਤੋਂ ਵੱਧ ਪੁਲਿਸ ਅਧਿਕਾਰੀ ਜਾਂਚ ਅਧੀਨ ਹਨ।
ਕਾਰਜਕਾਰੀ ਡਿਪਟੀ ਕਮਿਸ਼ਨਰ ਮਾਈਕਲ ਜੌਹਨਸਨ ਨੇ ਇਸ ਮਾਮਲੇ ‘ਤੇ ਗੰਭੀਰ ਚਿੰਤਾ ਜ਼ਾਹਿਰ ਕਰਦੇ ਹੋਏ ਕਿਹਾ ਕਿ ਇਹ ਅੰਕੜੇ “ਅਵਿਸ਼ਵਾਸ਼ਯੋਗ ਤੌਰ ‘ਤੇ ਨਿਰਾਸ਼ਾਜਨਕ ਅਤੇ ਚਿੰਤਾਜਨਕ” ਹਨ। ਉਨ੍ਹਾਂ ਨੇ ਪੁਸ਼ਟੀ ਕੀਤੀ ਕਿ ਲਗਭਗ 120 ਅਧਿਕਾਰੀ ਇਸ ਵੇਲੇ ਇੱਕ ਅਨੁਸ਼ਾਸਨਾਤਮਕ ਪ੍ਰਕਿਰਿਆ ਦਾ ਸਾਹਮਣਾ ਕਰ ਰਹੇ ਹਨ ਅਤੇ ਜਾਂਚ ਜਾਰੀ ਹੈ।
RNZ ਦੇ ਅਨੁਸਾਰ, ਇਕ ਅੰਦਰੂਨੀ ਮੀਮੋ ਸਾਹਮਣੇ ਆਇਆ ਹੈ ਜੋ ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਜੌਹਨਸਨ ਵੱਲੋਂ ਸਟਾਫ ਨੂੰ ਭੇਜਿਆ ਗਿਆ ਸੀ। ਮੀਮੋ ਵਿੱਚ ਕਿਹਾ ਗਿਆ ਹੈ ਕਿ ਅਗਸਤ 2025 ਵਿੱਚ ਡਾਟਾ ਦੀ ਸਮੀਖਿਆ ਦੌਰਾਨ ਨੈਸ਼ਨਲ ਰੋਡ ਪੁਲਿਸਿੰਗ ਸੈਂਟਰ ਦੀ ਇੰਟੈਲੀਜੈਂਸ ਅਤੇ ਪ੍ਰਦਰਸ਼ਨ ਟੀਮ ਨੇ ਸਾਹ ਟੈਸਟ ਰਿਕਾਰਡਾਂ ਵਿੱਚ “ਵਿਸ਼ਾਲ ਵਿਗਾੜ” ਪਾਇਆ।
1 ਜੁਲਾਈ 2024 ਤੋਂ 17 ਅਗਸਤ 2025 ਤੱਕ ਦੇ ਸਮੇਂ ਵਿੱਚ ਕੀਤੇ ਗਏ 46 ਲੱਖ ਤੋਂ ਵੱਧ ਟੈਸਟਾਂ ਦੇ ਆਡਿਟ ਵਿੱਚ ਇਹ ਸਾਹਮਣੇ ਆਇਆ ਕਿ ਕਈ ਟੈਸਟ ਅਸਲ ਵਿੱਚ ਕੀਤੇ ਹੀ ਨਹੀਂ ਗਏ, ਸਗੋਂ ਡਰਾਈਵਰ ਦੀ ਮੌਜੂਦਗੀ ਤੋਂ ਬਿਨਾਂ ਸਿਸਟਮ ਵਿੱਚ ਸਿਮੂਲੇਟ ਕਰਕੇ ਦਰਜ ਕੀਤੇ ਗਏ। ਮਤਲਬ—ਕੁੱਝ ਅਧਿਕਾਰੀਆਂ ਨੇ ਟੈਸਟ ਕਰਨ ਦੀ ਬਜਾਏ ਕੇਵਲ ਰਿਕਾਰਡ ਭਰ ਦਿੱਤਾ।
ਮੀਮੋ ਵਿੱਚ ਸਟਾਫ ਨੂੰ ਸਖ਼ਤ ਚੇਤਾਵਨੀ ਦਿੱਤੀ ਗਈ ਹੈ, ਜਿਸ ਵਿੱਚ ਲਿਖਿਆ ਹੈ:
“ਇਹ ਉਹ ਵਰਤਾਰਾ ਨਹੀਂ, ਜੋ ਪੁਲਿਸ ਵਿਭਾਗ ਆਪਣੇ ਅਧਿਕਾਰੀਆਂ ਤੋਂ ਉਮੀਦ ਕਰਦਾ ਹੈ। ਸਾਰੇ ਕਰਮਚਾਰੀਆਂ ਨੂੰ ਚਾਹੀਦਾ ਹੈ ਕਿ ਉਹ ਹਰ ਟੈਸਟ ਅਤੇ ਇਸਦੀ ਰਿਕਾਰਡਿੰਗ ਦੌਰਾਨ ਨਿਯਮਾਂ ਦੀ ਸਖ਼ਤੀ ਨਾਲ ਪਾਲਣਾ ਕਰਨ।”
ਇਹ ਖੁਲਾਸਾ ਸੜਕ ਸੁਰੱਖਿਆ ਅਤੇ ਪੁਲਿਸ ਪ੍ਰਕਿਰਿਆਵਾਂ ਦੀ ਸਥੇਤੀ ਨੂੰ ਲੈ ਕੇ ਗੰਭੀਰ ਸਵਾਲ ਖੜ੍ਹੇ ਕਰ ਰਿਹਾ ਹੈ। ਜਾਂਚ ਦੇ ਨਤੀਜਿਆਂ ਤੋਂ ਬਾਅਦ ਸੰਭਵ ਹੈ ਕਿ ਕਈ ਅਧਿਕਾਰੀਆਂ ‘ਤੇ ਕੜੀ ਕਾਰਵਾਈ ਕੀਤੀ ਜਾਵੇ।
ਨਿਊਜ਼ੀਲੈਂਡ ਪੁਲਿਸ ਵਿੱਚ ਵੱਡਾ ਖੁਲਾਸਾ: 30 ਹਜ਼ਾਰ ਸ਼ਰਾਬ ਸਾਹ ਟੈਸਟ ‘ਝੂਠੇ’ ਦਰਜ, 100 ਤੋਂ ਵੱਧ ਅਧਿਕਾਰੀ ਜਾਂਚ ਦੇ ਘੇਰੇ ਵਿੱਚ
