ਆਕਲੈਂਡ (ਐੱਨ ਜੈੱਡ ਤਸਵੀਰ) ਪੁਲਿਸ ਮੁਤਾਬਕ, ਪੱਛਮੀ ਔਕਲੈਂਡ ਦੇ ਹੈਂਡਰਸਨ ਇਲਾਕੇ ‘ਚ ਇਕ ਵਿਅਕਤੀ ਸੜਕ ‘ਤੇ ਤੁਰਦਾ ਹੋਇਆ ਕਈ ਲੋਕਾਂ ‘ਤੇ ਹਮਲੇ ਕਰਦਾ ਗਿਆ, ਜਿਸ ਕਾਰਨ ਕਈ ਲੋਕ ਜ਼ਖ਼ਮੀ ਹੋ ਗਏ।
ਇਸ ਘਟਨਾ ਤੋਂ ਬਾਅਦ ਪੁਲਿਸ ਨੇ ਸ਼ਾਮ ਦੇ ਸਮੇਂ ਉਸ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ‘ਤੇ 10 ਤੋਂ ਵੱਧ ਮਾਮਲਿਆਂ ਵਿੱਚ ਦੋਸ਼ ਲਗਾਏ ਗਏ ਹਨ।
ਪੁਲਿਸ ਅਨੁਸਾਰ, ਸ਼ਾਮ 5.24 ਵਜੇ ਦੇ ਕਰੀਬ ਹੈਂਡਰਸਨ ਦੀ ਰੇਲਸਾਈਡ ਐਵਨਿਊ ‘ਤੇ ਹੋ ਰਹੀਆਂ ਹਿੰਸਕ ਘਟਨਾਵਾਂ ਬਾਰੇ ਕਈ ਕਾਲਾਂ ਮਿਲੀਆਂ। ਕੁਝ ਸਮੇਂ ਬਾਅਦ 30 ਸਾਲਾ ਸ਼ੱਕੀ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਵੇਟੇਮਾਤਾ ਵੈਸਟ ਖੇਤਰ ਦੇ ਕਮਾਂਡਰ ਇੰਸਪੈਕਟਰ ਸਾਇਮਨ ਵਾਲਕਰ ਨੇ ਕਿਹਾ ਕਿ ਇਸ ਵਿਅਕਤੀ ਦਾ ਵਰਤਾਅ “ਬਿਲਕੁਲ ਅਸਵੀਕਾਰਯੋਗ” ਹੈ ਅਤੇ ਇਹ ਹੈਂਡਰਸਨ ਸਮਾਜ ਦੇ ਮੂਲ ਮੁੱਲਾਂ ਤੇ ਮਿਆਰਾਂ ਦੀ ਪ੍ਰਤੀਨਿਧਤਾ ਨਹੀਂ ਕਰਦਾ।
ਗ੍ਰਿਫ਼ਤਾਰ ਵਿਅਕਤੀ ਨੂੰ ਅੱਜ ਵੈਟਾਕੇਰੇ ਜ਼ਿਲ੍ਹਾ ਅਦਾਲਤ ‘ਚ ਪੇਸ਼ ਕੀਤਾ ਗਿਆ, ਜਿੱਥੇ ਉਸ ‘ਤੇ ਇਹ ਦੋਸ਼ ਲੱਗੇ ਹਨ। ਪੰਜ ਦੋਸ਼ – ਇਰਾਦੇ ਨਾਲ ਚੋਟ ਪਹੁੰਚਾਉਣ ਦੀ ਨੀਅਤ ਨਾਲ ਹਮਲੇ ਦੇ,ਦੋ ਦੋਸ਼ – ਇਰਾਦੇ ਨਾਲ ਜਖ਼ਮੀ ਕਰਨ ਦੇ,ਇੱਕ ਦੋਸ਼ – ਆਮ ਹਮਲੇ ਦਾ, ਦੋ ਦੋਸ਼ – ਪੁਲਿਸ ਦਾ ਵਿਰੋਧ ਕਰਨ ਦੇ, ਦੋ ਦੋਸ਼ – ਪੁਲਿਸ ਦੇ ਕੰਮ ‘ਚ ਰੁਕਾਵਟ ਪੈਦਾ ਕਰਨ ਦੇ, ਅਤੇ ਇੱਕ ਦੋਸ਼ ਚੋਰੀ ਦਾ ਵੀ ਲਗਾਇਆ ਗਿਆ ਹੈ।
ਅਦਾਲਤ ਨੇ ਉਸ ਵਿਅਕਤੀ ਨੂੰ ਹਿਰਾਸਤ ‘ਚ ਭੇਜ ਦਿੱਤਾ ਹੈ ਅਤੇ ਉਹ ਹੁਣ ਦਸੰਬਰ ਵਿੱਚ ਮੁੜ ਅਦਾਲਤ ‘ਚ ਪੇਸ਼ ਹੋਵੇਗਾ।
ਇੰਸਪੈਕਟਰ ਵਾਲਕਰ ਨੇ ਕਿਹਾ ਕਿ ਘਟਨਾ ਸਥਾਨ ‘ਤੇ ਮੌਜੂਦ ਲੋਕਾਂ ਨੇ ਤੁਰੰਤ ਇੱਕ-ਦੂਜੇ ਦੀ ਮਦਦ ਕੀਤੀ ਅਤੇ ਪੁਲਿਸ ਦੇ ਪਹੁੰਚਣ ਤੱਕ ਹੋਰਾਂ ਦੀ ਸੁਰੱਖਿਆ ਯਕੀਨੀ ਬਣਾਈ।
ਉਨ੍ਹਾਂ ਕਿਹਾ, “ਜਨਤਾ ਦੇ ਇਹ ਹਿੰਮਤਵਾਨ ਕਦਮ ਸਾਡੇ ਸਮਾਜ ਦੀ ਏਕਤਾ ਅਤੇ ਹੌਂਸਲੇ ਦਾ ਪ੍ਰਤੀਕ ਹਨ। ਅਸੀਂ ਉਨ੍ਹਾਂ ਦੀ ਸ਼ਲਾਘਾ ਕਰਦੇ ਹਾਂ, ਪਰ ਸਭ ਨੂੰ ਯਾਦ ਦਿਵਾਉਂਦੇ ਹਾਂ ਕਿ ਅਜਿਹੇ ਹਾਲਾਤਾਂ ਵਿੱਚ ਸਭ ਤੋਂ ਸੁਰੱਖਿਅਤ ਤਰੀਕਾ ਸਿੱਧਾ ਪੁਲਿਸ ਨਾਲ ਸੰਪਰਕ ਕਰਨਾ ਹੈ।”ਪੁਲਿਸ ਨੇ ਘਟਨਾ ਦੇ ਕਿਸੇ ਵੀ ਗਵਾਹ ਜਾਂ ਜਾਣਕਾਰੀ ਰੱਖਣ ਵਾਲੇ ਵਿਅਕਤੀਆਂ ਨੂੰ ਅੱਗੇ ਆਉਣ ਦੀ ਅਪੀਲ ਕੀਤੀ ਹੈ।
ਹੈਂਡਰਸਨ ‘ਚ ਲੋਕਾਂ ‘ਤੇ ਹਮਲੇ ਕਰਨ ਵਾਲਾ ਵਿਅਕਤੀ ਗ੍ਰਿਫ਼ਤਾਰ
