ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਦੇ ਵਿਦੇਸ਼ ਮਾਮਲਿਆਂ ਦੇ ਮੰਤਰੀ ਵਿੰਸਟਨ ਪੀਟਰਜ਼ ਇੱਕ ਸਾਲ ਬਾਅਦ ਕਿਰਿਬਾਤੀ ਦੇ ਸਰਕਾਰੀ ਦੌਰੇ ‘ਤੇ ਰਵਾਨਾ ਹੋ ਰਹੇ ਹਨ। ਇਹ ਦੌਰਾ ਉਸ ਘਟਨਾ ਤੋਂ ਬਾਅਦ ਹੋ ਰਿਹਾ ਹੈ ਜਦੋਂ ਪਿਛਲੇ ਸਾਲ ਕਿਰਿਬਾਤੀ ਸਰਕਾਰ ਵੱਲੋਂ ਉਨ੍ਹਾਂ ਨਾਲ ਨਿਰਧਾਰਿਤ ਮੁਲਾਕਾਤ ਨੂੰ ਅਚਾਨਕ ਰੱਦ ਕਰ ਦਿੱਤਾ ਗਿਆ ਸੀ, ਜਿਸਨੂੰ ਰਾਜਨੀਤਿਕ ਹਲਕਿਆਂ ਵਿੱਚ “ਸਨੱਬ” ਵਜੋਂ ਦੇਖਿਆ ਗਿਆ।
ਵਿੰਸਟਨ ਪੀਟਰਜ਼ ਨੇ ਦੌਰੇ ਤੋਂ ਪਹਿਲਾਂ ਕਿਹਾ ਕਿ ਨਿਊਜ਼ੀਲੈਂਡ ਕਿਰਿਬਾਤੀ ਨਾਲ ਆਪਣੇ ਰਿਸ਼ਤਿਆਂ ਨੂੰ ਮਜ਼ਬੂਤ ਕਰਨ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ ਅਤੇ ਇਹ ਯਾਤਰਾ ਦੋਵੇਂ ਦੇਸ਼ਾਂ ਦਰਮਿਆਨ ਭਰੋਸੇ ਅਤੇ ਸਹਿਯੋਗ ਨੂੰ ਅੱਗੇ ਵਧਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੋਵੇਗੀ।
ਇਹ ਦੌਰਾ ਖ਼ਾਸ ਮਹੱਤਵ ਰੱਖਦਾ ਹੈ ਕਿਉਂਕਿ 2019 ਤੋਂ ਬਾਅਦ ਇਹ ਕਿਸੇ ਵੀ ਨਿਊਜ਼ੀਲੈਂਡ ਵਿਦੇਸ਼ ਮੰਤਰੀ ਦਾ ਪਹਿਲਾ ਕਿਰਿਬਾਤੀ ਦੌਰਾ ਹੋਵੇਗਾ। ਪੀਟਰਜ਼ ਇਸ ਯਾਤਰਾ ਦੌਰਾਨ ਕਲਾਈਮਟ ਚੇਂਜ, ਸੁਰੱਖਿਆ, ਵਿਕਾਸ ਸਹਿਯੋਗ ਅਤੇ ਪੈਸਿਫਿਕ ਖੇਤਰ ਵਿੱਚ ਸਾਂਝੇ ਮਸਲਿਆਂ ‘ਤੇ ਗੱਲਬਾਤ ਕਰਨਗੇ।
ਇਸ ਦੌਰੇ ਨਾਲ ਵਿੰਸਟਨ ਪੀਟਰਜ਼ ਪੈਸਿਫਿਕ ਆਇਲੈਂਡਸ ਫੋਰਮ ਦੇ ਸਾਰੇ 17 ਮੈਂਬਰ ਦੇਸ਼ਾਂ ਦਾ ਦੌਰਾ ਕਰਨ ਵਾਲੇ ਪਹਿਲੇ ਨਿਊਜ਼ੀਲੈਂਡ ਵਿਦੇਸ਼ ਮੰਤਰੀ ਬਣ ਜਾਣਗੇ। ਯਾਤਰਾ ਦੌਰਾਨ ਉਹ ਪਾਲਾਉ ਵੀ ਜਾਣਗੇ, ਜਿੱਥੇ ਇਸ ਸਾਲ ਪੈਸਿਫਿਕ ਆਇਲੈਂਡਸ ਫੋਰਮ ਦੀ ਅਹਿਮ ਮੀਟਿੰਗ ਹੋਣੀ ਹੈ। ਨਿਊਜ਼ੀਲੈਂਡ 2027 ਵਿੱਚ ਇਸ ਫੋਰਮ ਦੀ ਮੇਜ਼ਬਾਨੀ ਵੀ ਕਰਨ ਜਾ ਰਿਹਾ ਹੈ।
ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀਆਂ ਮੁਤਾਬਕ, ਇਹ ਦੌਰਾ ਪੈਸਿਫਿਕ ਖੇਤਰ ਵਿੱਚ ਨਿਊਜ਼ੀਲੈਂਡ ਦੀ ਕੂਟਨੀਤਿਕ ਸਰਗਰਮੀ ਅਤੇ ਭੂਮਿਕਾ ਨੂੰ ਮਜ਼ਬੂਤ ਕਰਨ ਵੱਲ ਇੱਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।