ਗਲਤ ਟਰੈਕ ‘ਤੇ ਚਲਾਈ ਗਈ ਆਕਲੈਂਡ ਟ੍ਰੇਨ, ਯਾਤਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਗਿਆ

ਆਕਲੈਂਡ (ਐੱਨ ਜੈੱਡ ਤਸਵੀਰ) ਆਕਲੈਂਡ ਵਿੱਚ ਇੱਕ ਯਾਤਰੀ ਟ੍ਰੇਨ ਨੂੰ ਗਲਤੀ ਨਾਲ ਗਲਤ ਟਰੈਕ ‘ਤੇ ਰੂਟ ਕਰਨ ਕਾਰਨ ਟ੍ਰੇਨ ਸੇਵਾ ਵਿੱਚ ਵੱਡਾ ਵਿਘਨ ਪਿਆ, ਜਿਸ ਤੋਂ ਬਾਅਦ ਟ੍ਰੇਨ ਵਿੱਚ ਸਵਾਰ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਤਰੀਕੇ ਨਾਲ ਬਾਹਰ ਕੱਢਿਆ ਗਿਆ। ਘਟਨਾ ਮੰਗਲਵਾਰ ਨੂੰ ਵਾਪਰੀ।
ਆਕਲੈਂਡ ਟ੍ਰਾਂਸਪੋਰਟ ਅਨੁਸਾਰ, ਇਹ ਇਲੈਕਟ੍ਰਿਕ ਟ੍ਰੇਨ ਇੱਕ ਅਜਿਹੇ ਟਰੈਕ ‘ਤੇ ਚਲ ਪਈ ਜੋ ਬਿਜਲੀ ਸਪਲਾਈ ਵਾਲਾ ਨਹੀਂ ਸੀ, ਜਿਸ ਕਾਰਨ ਟ੍ਰੇਨ ਦੇ ਉਪਰਲੇ ਬਿਜਲੀ ਤਾਰਾਂ ਅਤੇ ਪੈਂਟੋਗ੍ਰਾਫ ਨੂੰ ਨੁਕਸਾਨ ਪਹੁੰਚਿਆ। ਟ੍ਰੇਨ ਅੱਗੇ ਨਹੀਂ ਵਧ ਸਕੀ ਅਤੇ ਯਾਤਰੀਆਂ ਨੂੰ ਲਗਭਗ ਦੋ ਘੰਟਿਆਂ ਤੱਕ ਟ੍ਰੇਨ ਵਿੱਚ ਰੁਕਣਾ ਪਿਆ।
ਟ੍ਰੇਨ ਵਿੱਚ ਮੌਜੂਦ 24 ਯਾਤਰੀਆਂ ਨੂੰ ਬਾਅਦ ਵਿੱਚ ਐਮਰਜੈਂਸੀ ਪ੍ਰੋਟੋਕੋਲ ਤਹਿਤ ਟ੍ਰੈਕ ਰਾਹੀਂ ਬਾਹਰ ਕੱਢਿਆ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਘਟਨਾ ਦੌਰਾਨ ਕੋਈ ਵੀ ਜਾਨੀ ਨੁਕਸਾਨ ਨਹੀਂ ਹੋਇਆ ਅਤੇ ਸਾਰੇ ਯਾਤਰੀ ਸੁਰੱਖਿਅਤ ਹਨ।
ਘਟਨਾ ਦੀ ਜਾਣਕਾਰੀ ਮਿਲਦਿਆਂ ਹੀ ਰੇਲ ਸੇਵਾਵਾਂ ਲਈ ਜ਼ਿੰਮੇਵਾਰ ਅਧਿਕਾਰੀਆਂ ਅਤੇ ਇੱਕ ਰੇਲ ਇਨਸੀਡੈਂਟ ਕੰਟਰੋਲਰ ਮੌਕੇ ‘ਤੇ ਭੇਜਿਆ ਗਿਆ, ਜਿਸ ਨੇ ਸਥਿਤੀ ਨੂੰ ਸੰਭਾਲਿਆ ਅਤੇ ਰਿਕਵਰੀ ਕਾਰਵਾਈ ਦੀ ਨਿਗਰਾਨੀ ਕੀਤੀ।
ਆਕਲੈਂਡ ਟ੍ਰਾਂਸਪੋਰਟ ਨੇ ਕਿਹਾ ਹੈ ਕਿ ਇਹ ਗੰਭੀਰ ਸੁਰੱਖਿਆ ਲਾਪਰਵਾਹੀ ਹੈ ਅਤੇ ਇਸ ਦੀ ਪੂਰੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ, ਤਾਂ ਜੋ ਪਤਾ ਲੱਗ ਸਕੇ ਕਿ ਟ੍ਰੇਨ ਨੂੰ ਗਲਤ ਟਰੈਕ ‘ਤੇ ਕਿਵੇਂ ਭੇਜਿਆ ਗਿਆ। ਅਧਿਕਾਰੀਆਂ ਨੇ ਯਕੀਨ ਦਿਵਾਇਆ ਹੈ ਕਿ ਭਵਿੱਖ ਵਿੱਚ ਅਜਿਹੀ ਘਟਨਾ ਦੁਬਾਰਾ ਨਾ ਹੋਵੇ, ਇਸ ਲਈ ਲੋੜੀਂਦੇ ਕਦਮ ਚੁੱਕੇ ਜਾਣਗੇ।
ਇਸ ਘਟਨਾ ਕਾਰਨ ਕੁਝ ਸਮੇਂ ਲਈ ਆਕਲੈਂਡ ਦੀ ਰੇਲ ਸੇਵਾ ਪ੍ਰਭਾਵਿਤ ਰਹੀ, ਜਿਸ ਨਾਲ ਦਿਨ ਭਰ ਯਾਤਰੀਆਂ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ।