ਆਕਲੈਂਡ, (ਐੱਨ ਜੈੱਡ ਤਸਵੀਰ) ਵੈਲਿੰਗਟਨ ਖੇਤਰ ਵਿੱਚ ਖਸਰੇ ਦੇ ਦੋ ਨਵੇਂ ਮਾਮਲੇ ਦਰਜ ਕੀਤੇ ਗਏ ਹਨ, ਜਿਸ ਨਾਲ ਨਿਊਜ਼ੀਲੈਂਡ ਭਰ ਵਿੱਚ ਕੁੱਲ ਪੁਸ਼ਟੀਸ਼ੁਦਾ ਮਾਮਲਿਆਂ ਦੀ ਗਿਣਤੀ ਹੁਣ 16 ਹੋ ਗਈ ਹੈ। ਹੈਲਥ ਨਿਊਜ਼ੀਲੈਂਡ ਦੇ ਅਨੁਸਾਰ, ਨਵੀਆਂ ਸੰਕਰਮਿਤਾਂ ਵਿੱਚੋਂ ਇੱਕ ਵੈਲਿੰਗਟਨ ਗਰਲਜ਼ ਕਾਲਜ ਦੀ ਵਿਦਿਆਰਥਣ ਹੈ। ਦੂਜੇ ਮਾਮਲੇ ਬਾਰੇ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਉਸਦਾ ਕਿਸੇ ਮੌਜੂਦਾ ਮਾਮਲੇ ਨਾਲ ਸੰਪਰਕ ਸੀ ਜਾਂ ਨਹੀਂ। ਦੋਹਾਂ ਵਿੱਚੋਂ ਕਿਸੇ ਨੇ ਵੀ ਵਿਦੇਸ਼ ਯਾਤਰਾ ਨਹੀਂ ਕੀਤੀ ਸੀ।
ਹੈਲਥ ਨਿਊਜ਼ੀਲੈਂਡ ਨੇ ਦੱਸਿਆ ਕਿ ਉਹ ਸਕੂਲ ਪ੍ਰਸ਼ਾਸਨ ਨਾਲ ਮਿਲ ਕੇ ਇਸ ਸੰਕਰਮਣ ਨੂੰ ਰੋਕਣ ਲਈ ਤੁਰੰਤ ਕਦਮ ਚੁੱਕ ਰਹੇ ਹਨ ਤਾਂ ਜੋ ਸਕੂਲੀ ਭਾਈਚਾਰੇ ਵਿੱਚ ਵਾਇਰਸ ਨਾ ਫੈਲੇ।
ਇਸ ਸਮੇਂ ਵੈਲਿੰਗਟਨ ਵਿੱਚ ਛੇ, ਆਕਲੈਂਡ ਵਿੱਚ ਪੰਜ, ਮਾਨਵਾਤੂ ਵਿੱਚ ਦੋ, ਜਦਕਿ ਨੌਰਥਲੈਂਡ, ਤਰਾਨਾਕੀ ਅਤੇ ਨੈਲਸਨ ਵਿੱਚ ਇੱਕ-ਇੱਕ ਮਾਮਲੇ ਦੀ ਪੁਸ਼ਟੀ ਹੋਈ ਹੈ।
ਹੈਲਥ ਨਿਊਜ਼ੀਲੈਂਡ ਦੇ ਅਨੁਸਾਰ, ਸ਼ੁੱਕਰਵਾਰ ਨੂੰ ਦੇਸ਼ ਭਰ ਵਿੱਚ ਐੱਮਐੱਮਆਰ ਟੀਕੇ ਦੀਆਂ 2098 ਖੁਰਾਕਾਂ ਦਿੱਤੀਆਂ ਗਈਆਂ, ਜੋ 2019 ਤੋਂ ਬਾਅਦ ਦੀ ਸਭ ਤੋਂ ਵੱਡੀ ਰੋਜ਼ਾਨਾ ਗਿਣਤੀ ਹੈ।
ਮੌਜੂਦਾ 16 ਮਾਮਲਿਆਂ ਦੇ ਨਾਲ, ਸਿਹਤ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਦੇਸ਼ ਭਰ ਵਿੱਚ ਕਰੀਬ 2000 ਨਜ਼ਦੀਕੀ ਸੰਪਰਕਾਂ ਦੀ ਨਿਗਰਾਨੀ ਕੀਤੀ ਜਾ ਰਹੀ ਹੈ।
ਵੈਲਿੰਗਟਨ ਵਿੱਚ ਖਸਰੇ ਦੇ ਹੋਰ ਦੋ ਮਾਮਲੇ, ਦੇਸ਼ ਭਰ ਵਿੱਚ ਗਿਣਤੀ 16 ’ਤੇ ਪਹੁੰਚੀ
