ਆਕਲੈਂਡ (ਐੱਨ ਜੈੱਡ ਤਸਵੀਰ) ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ ਨੇ ਵੱਡੀ ਕਾਰਵਾਈ ਕਰਦਿਆਂ 440 ਨਕਲੀ ਜਾਂ ਤਬਦੀਲ ਕੀਤੇ ਗਏ ਕਮਰਸ਼ਲ ਡਰਾਈਵਰ ਲਾਇਸੰਸ ਬੇਨਕਾਬ ਕਰ ਕੇ ਤੁਰੰਤ ਪ੍ਰਭਾਵ ਨਾਲ ਰੱਦ ਕਰ ਦਿੱਤੇ ਹਨ।
ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ ਨੇ ਦੱਸਿਆ ਕਿ ਜੁਲਾਈ 2025 ਦੇ ਦੌਰਾਨ ਲਾਇਸੰਸ “ਕਨਵਰਜ਼ਨ ਪ੍ਰਕਿਰਿਆ” ਦੀ ਔਡਿਟ ਵਿੱਚ ਇਹ ਨਕਲੀ ਦਸਤਾਵੇਜ਼ ਸਾਹਮਣੇ ਆਏ, ਜਿਨ੍ਹਾਂ ਦੀ ਮਦਦ ਨਾਲ ਵਿਦੇਸ਼ੀ ਡਰਾਈਵਿੰਗ ਲਾਇਸੰਸ ਨੂੰ ਨਿਊਜ਼ੀਲੈਂਡ ਲਾਇਸੰਸ ਵਿੱਚ ਤਬਦੀਲ ਕੀਤਾ ਗਿਆ ਸੀ।
ਲੈਂਡ ਟਰਾਂਸਪੋਰਟ ਦੇ ਡਿਪਟੀ ਡਾਇਰੈਕਟਰ ਮਾਈਕ ਹਾਰਗਰੇਵਜ਼ ਨੇ ਕਿਹਾ,
“ਸਾਡੇ ਕੋਲ ਧੋਖਾਧੜੀ ਦੀ ਪਛਾਣ ਅਤੇ ਜਾਂਚ ਲਈ ਮਜ਼ਬੂਤ ਸਿਸਟਮ ਹੈ। ਜਿੱਥੇ ਵੀ ਫਰਾਡ ਮਿਲਦਾ ਹੈ, ਅਸੀਂ ਤੁਰੰਤ ਕਾਰਵਾਈ ਕਰਦੇ ਹਾਂ ਅਤੇ ਜ਼ਿੰਮੇਵਾਰਾਂ ਨੂੰ ਸਜ਼ਾ ਤੋਂ ਬਚਣ ਨਹੀਂ ਦਿੱਤਾ ਜਾਵੇਗਾ।”
ਏਜੰਸੀ ਇਸ ਸਮੇਂ ਉਹਨਾਂ ਸਾਰੇ ਲੋਕਾਂ ਨਾਲ ਸੰਪਰਕ ਕਰ ਰਹੀ ਹੈ ਜਿਨ੍ਹਾਂ ਦੇ ਲਾਇਸੰਸ ਰੱਦ ਕੀਤੇ ਗਏ ਹਨ।
ਲੈਂਡ ਟਰਾਂਸਪੋਰਟ ਐਕਟ 1998 ਅੰਤર્ગਤ ਡਰਾਈਵਰ ਲਾਇਸੰਸ ਅਰਜ਼ੀ ਦੌਰਾਨ ਨਕਲੀ ਜਾਂ ਗੁੰਮਰਾਹ ਕਰਨ ਵਾਲੀ ਜਾਣਕਾਰੀ ਦੇਣਾ ਇੱਕ ਕਾਨੂਨੀ ਉਲੰਘਣਾ ਹੈ, ਜਿਸ ਲਈ ਵੱਧ ਤੋਂ ਵੱਧ $750 ਤੱਕ ਜੁਰਮਾਨਾ ਹੋ ਸਕਦਾ ਹੈ।
ਨਿਊਜ਼ੀਲੈਂਡ ਵਿੱਚ 440 ਨਕਲੀ ਕਮਰਸ਼ੀਅਲ ਡਰਾਈਵਿੰਗ ਲਾਇਸੰਸ ਰੱਦ
